جمہوریت نا سوگوی کن جہد ءِ برجا تخنہ‘بلاول بھٹو زرداری

اسلام آباد ( آن لائن) پیپلز پارٹی نا چیئرمین بلاول بھٹو زرداری جہانی یومِ جمہوریت آ تینا کلہو اٹ پارینے کہ جمہوریت ءِ سوگو کننگ ہر قوم انا انفرادی زمواری تون اوار اوار دا جمہوریت پسند دنیا نا اجتماعی ذمواری ہم ارے، پیپلز پارٹی ایلو جمہوریت پسند جماعت آتون ملسا ملک اٹ جمہوریت نا سوگوی کن کوشست آتے برجا تخک، انتئے کہ اسہ سوگو ءُ جمہوریت اس سوگو ءُ پاکستان اسے انا اسٹ انگا ضمانت ءِ، انتقامی کاروائیک، دھمکی و سٹی آ مقدمہ غاک ننا پارٹی و ایلو جمہورییت پسند طاقت آتے توننگ کپسہ، دا ظلم و بیدادی ننے تینا دا جمہوریت پسند کماش آتا مشن آن توننگ کپک ہرافک جام شہادت ءِ تو امنا کریر ولے سلہہ بٹنگ آن نمن مسوسُر۔ او پارینے کہ اقوام متحدہ نا ہمو بیان نا تائید ءِ کیوہ، ہراٹی جمہوریت نا المی آ بشخ آتے پیدوار کننگانے، آجوئی نا قدر، انسانی حق آتا شرفمندی، پک کروک آ گچین کاری و ووٹر آتا کمک اٹ حقی ءُ گچین کاری کرفنگ جمہوریت نا بشخ آک ءُ۔