وزیر اعلیٰ نا کماشی ٹی کوئٹہ شار اٹ ٹریفک نا ویل انا بابت دیوان

کوئٹہ (خ ن) وزیراعلیٰ بلوچستان جام کمال خان نا کماشی ٹی کوئٹہ شار ءِ مون تروک ٹریفک نا ویل و اوفتا ایسری نا بابت دیوان اس اڈ ہلک۔ بڑزکو کہولی دیوان اٹی شار انا چندی علاقہ غاتیٹی ٹریفک نا زور ءِ شیف شاغنگ کن فلائی اوور و انڈر پاس نا سلاہ تیا سجفنگا۔ محکمہ مواصلات نا کنڈ آن دیوان ءِ دا ڈٹ آتا بابت بریفنگ تننگا۔ سیکرٹری مواصلات وتعمیرات، اسپیشل سیکرٹری خزانہ، سیکرٹری محکمہ ڈٹ بندی و شونداری، کمشنر کوئٹہ، ایس ایس پی ٹریفک ہم دیوان اٹ ساڑی ئسر۔ دا وخت آ وزیراعلیٰ نا پارت آتے مون آ تخسا پک کننگا کہ محکمہ مواصلات میزان چوک آن اسپنی روڈ، مین نالہ نا زی آن ایکسپریس وے اس تفنگ نا ڈٹ انا پی سی ون ءِ جوڑ کیک، وخت اس کہ عالمو چوک ایئرپورٹ روڈ آ ٹریفک نا زور ءِ شیف شاغنگ کن یوٹرن جوڑ کننگک، و سریاب روڈ آ مستونگ و سبی نا ٹریفک ءِ باضابطہ جوڑ کننگ کن ہم پولیس ٹریننگ کالج نا مون و گاہی خان چوک آ ٹریفک نا ہن و بر نا گچینی کن ہن و بر نا گچینی کن ہم یوٹرن ا جوڑ کننگک۔ دا وخت آ گپ و تران کرسا وزیراعلیٰ پارے کہ حکومت کوئٹہ شار اٹی مواصلات نا وڑ تا گچینی و شار ءِ ملنگ کن پوسکن آ سڑک آتا تفنگ و بھلنی کن کاریم کننگ اٹی ءِ۔ ولے شار اٹی ٹریفک نا زور ءِ شیف شاغنگ کن ٹریفک جام ءِ چٹفنگ نا گرج ءِ، ہراڑکن شار انا ہن بر نا کسر تا ٹریفک ءِ ضابطہ غاتا رد اٹ پک کننگ المی ءِ۔