نوکاپ نا زہمی تتون ہر وڑ انا کمک کینہ؍ مولانا نور محمد

ہرنائی (آن لائن) جماعت اسلامی نا ضلعی امیر مولانا نورمحمد پارینے کہ ضلع ہرنائی ٹی تدوک آ دے پِر و نوکاپ آن زہمی مروک بندغ آتتون ہر وڑ انا کمک کینہ۔ جماعت اسلامی و الخدمت ناکنڈآن ہرنائی ٹی نوکاپ نا زہمی بندغ آتا سروے ءِ کرسا زہمی بندغ آتا اُراتسکان کمکی گڑا سر کننگ انگ ءِ۔ اوپارے کہ ہرنائی ٹی پِر ونوکاپ محلہ جلال آباد، اخترآباد، میانی و ایلو علاقہ غاتے ٹی بھلو کچ اسے ٹی بندغ آتے بے اُرا کرینے و اُراتے ٹی ساڑی گڑاتے یا تو نوکاپ درینے یا گڑا اُراتا چھت آتا تمنگ آن پورو بھس مسنو۔ اوپارے کہ جماعت اسلامی الخدمت نا کمک اٹ نوکاپ و پِر آن زہمی بندغ آتا کمک کننگ کن اولیکو دے آن پڑ آٹے۔ او پارے کہ ہراتم نوکاپ اُراتے ٹی پترینگا تو ہمو وخت آ ہم جماعت اسلامی و الخدمت نا رضاکار آک کمک کننگ کن کل آن مست سرمسر‘ اوکان گڈ غٹ زہمی تا سروے کننگا و داسہ زہمی تے ٹی تمبو‘ گرم کمبل وایلو المی گڑاتے بشخ وپانٹ کننگ اٹی ءِ۔ اوپارے کہ نن ہر وڑ انا تعصب رنگ نسل بولی قوم و سیاست آن ایڑتر کمکی گڑاتے حقی آ زہمی تا اُراتے ٹی سر کننگ اٹی ان۔