راشن تننگ نا فارم الس ءِ فریشان کرینے، بی این پی نوکنڈی

نوکنڈی (آن لائن) بلوچستان نیشنل پارٹی تحصیل نوکنڈی تفتان نا ترجمان پریس ریلیز جاری کرسا پارے کہ صوبائی حکومت و وزیر محنت و افرادی قوت ناکنڈآن اسہ فارم و اشتہار اس تننگاسس کہ دا فارم ءِ پُر کننگ آن پد بندغ آتے راشن تننگک‘ صوبائی نابود حکومت ہرا بندغ آتون دا حالیت اٹ ہم کمک کپننگ ءِ ولے بندغ آتے پین فریشان کننگ اٹی ءِ و مچ آ شار انا بندغ آک دا فارم ءِ دوئی کننگ کن خوار مننگ اٹی ءُ ہراکہ فکر انا ہیت اسے‘ دا فارم ہراکہ راشن نا بابت اف دا فارم سیمی گورنمنٹ آرگنائزیشن پروجیکٹ و لوکل و ملٹی نیشنل کمپنی تا بابت ءِ کہ اسہ مزور اسے نا ہم تنخواہ ءِ کاٹ کننگپ و اگہ تنخواہ تے کاٹ کننگانے تو ہر ادارہ تینا ملازم ءِ 17500 روپئی تننگ نا پابند ءِ۔ صوبائی حکومت ناکنڈآن میسج تننگا ہرانا سوب آن نوکنڈی تون اوار مچ آ بلوچستان ناالس ءِ فریشان کننگانے۔ ہندا سوب آن نوکنڈی انتظامیہ سستی نشان تننگ نا جاگہ غا دا عمل ءِ تورے۔