بلوچستان‘ بھلا عئید آ کل سیل سواتی ہند آتے ملپننگ نا فیصلہ

کوئٹہ( آن لائن) وزیراعلیٰ بلوچستان جام کمال خان نا کماشی ٹی اڈ ہلوک آ بڑزکو کہولی دیوان اٹ بھلا عئید و محرم الحرام نا ایس او پیز، سیکیورٹی، سفائی ایلو ویل آتا جاچ ءِ ہلسا اہم ءُ فیصلہ کننگا، صوبائی وزیر میر ضیا لانگو، میر ظہور احمد بلیدی، نور محمد دمڑ، پارلیمانی سیکرٹری بشری رند، ایڈیشنل چیف سیکریٹری داخلہ حافظ عبدالباسط، آئی جی پولیس محسن حسن بٹ، منہ محکمہ نا سیکریٹریک، ایڈمنسٹریٹر کوئٹہ طارق مینگل تون اوار ایلو کمامدار آک دیوان اٹ بشخ ہلک وخت اس کہ ڈویژنل کمشنرک بذریعہ وڈیو لنک دیوان اٹ بشخ ہلکر، دیوان ءِ اے سی ایس داخلہ حافظ عبدالباسط سیکیورٹی، عئید انا اجتماع تا اڈ تننگ نا گام گیج آک و ایلو ویل آتا بابت اٹ بریفنگ ترسا پارے کہ کوئٹہ ٹی 189 عیدگاہ تیٹی عئید نماز ادا مریک دا بابت اٹ ایس او پی تیا عملدرآمد، گام گیج، انتظام و سیکیورٹی نا بابت اٹ جوان گام گیج کرینو وخت اس کہ کل کالعدم تنظیم آتیان عئیدی تا سِل تے مُچ کننگ آ رکھ خلنگانے، دیوان ءِ بریفنگ ترسا پارینے کہ مچ آ صوبہ ٹی سرکاری کہول آ جوڑ انگا 74 پِڑی تے ٹی کورونا وائرس نا توننگ، سفائی و کانگو وائرس نا توننگ کن ہم گام گیج کننگانے، محکمہ لائیواسٹاک نا کنڈآن دیوان ءِ بریفنگ ترسا پاننگانے کہ پِڑی تے ٹی اسپرے ٹیم تعینات کننگانے وخت اس کہ جتا جتا انٹری پوائنٹ و مویشی منڈی تیٹی اسپرے کننگ انگ ءِ، دیوان ءِ محکمہ جانجوڑی نا کمامدار آتا کنڈآن تروک آ بریفنگ اٹ پاننگا کہ پِڑی تے ٹی جانجوڑی نا ریپڈ رسپانس ٹیم تون اوار موبائل ٹیمک جوان وڑ اٹ فعال ءُ، دیوان اٹ ڈویژنل کمشنرک کیو ایم سی و میونسپل ادارہ غاتے عئید و اوکان پد عئید سفائی و عئیدی تا گند آتے ڈم کننگ کن جوان گام گیج کننگ نا ہم پارت کننگا، دیوان اٹ عئید انا دے تیٹی مچ آ صوبہ ٹی سیل و سواتی آ ہند آک و پارک آتے پورو وڑاٹ بند کننگ نا فیصلہ کننگا، وخت اس کہ عئید انا وخت آ بازار و مارکیٹ آتے سہب انا نو بجہ غان نن نا 12بجہ اسکان کاروبار کننگ نا موکل تننگ نا ہم فیصلہ کننگا، دیوان آن تران کرسا وزیراعلی اُلس آن خواست کرے کہ کورونا وائرس نا سوب آن اُلس عئید ءِ سادگی ٹی اڈ ترسا اجتماع تے آن تینے بچفے۔ وخت اس کہ زیات وخت اُرے تیٹی تدیفنگ نا ہم پاننگا۔