عئید آن پد اپوزیشن نا اے پی سی نا پوفانک ترخک، سینیٹر شبلی فراز

لاہور ( آن لائن/ اے پی پی) بنجائی وزیر حوالکاری و شینکاری و سینیٹر شبلی فراز پارینے کہ عئید آن پد اپوزیشن نا آل پارٹیز کانفرنس (اے پی سی) نا پوفوک نا ہوا پیش تمک، تحریک انصاف نا حکومت زرگزرانی کاختی آن پیش تمنگ کن جوان ءُ گام گیج کرینے، اپوزیشن ءِ نیب کانود آ این آراو تننگ کپنہ حکومت کاہک تو دے اس مُست کاہے۔ تدوک آ دے لاہور اٹ میڈیا تون ہیت وگپ کرسا شبلی فراز پارینے کہ ننا کارکڑد انا کل آن جوان انگا جج پاکستان نا اُلس ءِ، تحریک انصاف نا حکومت نا فوکس اُلس نا حقی آ ویل آتیا ٹے۔ پاکستان تحریک انصاف نا ٹیم وزیراعظم عمران خان نا کماشی ٹی اسٹ ءِ۔ داکان مست وزیراعلیٰ پنجاب سردار محمد عثمان بزدار تون بنجائی وزیر حوالکاری وشینکاری سینیٹر شبلی فراز اوڑدہی کرے ہراٹی تین پہ تینی است خواہی نا باندات، سیاسی حالیت و میڈیا حکمت عملی آ گپ وتران کننگا۔ اوڑدہی ٹی الس ءِ ریلیف تننگ نا گام گیج و شرحالی نا ڈٹ آتیا ہم سجفنگا۔ وزیراعلیٰ پنجاب سردار عثمان بزدار حکومتی کارکڑد انا بابت گام گیج آتے پبی وڑاٹ تالان کرسا پارے کہ حکومت نا 2 سال انا کارکڑد مستین نا 30 سال انا دورغان بھاز گچین ءِ، حکومتی گام گیج آتے گچین وڑاٹ الس نا مون آ اتنگ کن میڈیا نا کڑد کلیدی اہمیت تخک۔ اوپارے کہ میڈیا نا تنقید آن راہشونی ملک۔ کرپٹ آتا بے پرخ پرسجو پاکستان نا شونداری و شونہالی نا ضامن ءِ، قومی وسیلہ غاتا غلط کاریم اٹ اتنگ نا مسکوہی روایت ءِ چٹفینن۔