ڈاکٹر ظفر مرزا و تانیہ ایدورس تینا عہدہ غاتیان استیفہ تسُر

اسلام آباد(آن لائن)وزیراعظم خصوصی کمکار جانجوڑی ڈاکٹر ظفر مرزا و ڈیجیٹل پاکستان تانیہ ایدورس اسہ دے اٹ تینا تینا عہدہ غاتیان استیفہ تسر۔ خصوصی آ کمکار آتا کنڈآن وزیراعظم نا سلاہکار و خصوصی کمکار نا اثاثہ جات و اِرا ملکی شہریت نا تفصیلات آتا جاری کننگ آن پد اپوزیشن نا تنقید نا بابت اٹ مون آ بس۔ حوال نا رداٹ راجی رابطہ نا ویب سائٹ آ ٹوئٹ کرسا وزیراعظم عمران خان نا خصوصی کمکار ڈیجیٹل پاکستان تانیہ ایدروس پارینے کہ کنا اِرا ملکی شہریت نا سوب آن ریاست آ تنقید کننگ انگ ءِ، ہراڑان ڈیجٹل پاکستان نا مسخت پدی تمننگ اٹی ءِ۔ تانیہ ایدروس پارینے کہ اُلس نا مفاد اٹ بطور خصوصی کمکار وزیراعظم نا عہدہ غان استیفہ تننگ نا فیصلہ کرینٹ۔ او تینا استیفہ ءِ جمع کرفینٹ۔ تانیہ ایدورس ٹوئٹ اٹ استیفہ ءِ اپ لوڈ کرسا وزیراعظم عمران خان آ راہی کرے۔ ہراٹی او وزیراعظم ءِ پارے کہ خصوصی کمکار نا وڑ اٹ کاریم کننگ کنکن اعزاز اس ئس او کنے آ تینا اعتماد ءِ بحال تخنگ آ نما منتوار اُٹ۔ او نوشتہ کرے کہ او ڈیجیٹل پاکستان نا وژن اٹ کڑد ادا کننگ و دانا شونداری نا اسٹ انگا مسخت تون اوار پاکستان آ پدی بسوسُٹ۔ ولدا ہم ملک انا خدمت و وزیراعظم عمران خان نا وژن ءِ تینا لائخی نا رداٹ برجا تخوہ۔