مکران ڈویژن تعلیم نا بابت گنج آتا خواجہ ءِ‘پروفیسر ڈاکٹر عبدالرزاق صابر

پنجگور (خ ن) یونیورسٹی آف تربت نا وائس چانسلرپروفیسرڈاکٹر عبدالرزاق صابر پارینے کہ مکران ڈویژن تعلیم نا بابت گنج آتا خواجہ ءِ و دا جاگہ نا ورناتے ٹی بے کچ لائخی ارے‘ اوفتا ٹےلنٹ ءِ مون آ تخسا تربت یونیورسٹی نا گوادر آن پد پنجگور اٹ ہم سب کیمپس جوڑ کننگانے ہراڑے اولیکو بیچ اٹ سَے سَد مار ومسڑ طالب علم تعلیم دوئی کیرہ۔دا خیال آتا درشانی ءِ او تدوک آدے پنجگور کیمپس نا دورہ ءِ کننگ نا وخت آ کرے۔ ہراڑے وائس چانسلر برجا شونداری کاریم تا جاچ ءِ ہلنگ آن بیدس پوسکن تعینات مروک کارندہ غاتون ہم اوڑدہی کرے۔دا وخت آ تربت یونیورسٹی نا ڈین فیکلٹی آف لیگل ایجوکیشن پروفیسرڈاکٹرگل حسن، وائس چانسلر نا پرنسپل اسٹاف آفیسر انجیبئر بلال الرحمان و پروکیورمنٹ آفیسر ایاز بلیدی ہم اوڑتون تُد ئس۔ وائس چانسلر کیمپس نا چندی بشخ آتادورہ ءِ کرے و برجا شونداری ڈٹ آتے زوت پورو کننگ ناپارت کرے۔ دیر انا تنکی ءِ اینک کننگ کن دا وخت آ او کیمپس نا دنگ اٹ بورنگ اس خلنگ نا منظوری ءِ تس۔ داوخت آ وائس چانسلر کیمپس کن ہلوک وین انا چابی تے کیمپس ناکارندہ غاتے تس۔داکان بیدس پوسکن تعینات مروک کارندہ غاتا اڈ ہلوک دیوان ناکماشی ءِ کرسا او پارے کہ دا اسہ قومی ءُ ادارہ سے دانا شونداری و خذمت ننا قومی فرض ءِ۔ وائس چانسلر پنجگورکیمپس نا جوڑ کننگ واونا شونداری کن کمک کننگ آ گورنر بلوچستان، وزیراعلیٰ بلوچستان، ہائرایجوکیشن کمیشن اسلام آباد، صوبائی وزیر و علاقہ نا نمائندہ‘ سرکڑدہ و سول سوسائٹی ناکڑدار نا خاص وڑ اٹ ذکر ءِ کرے۔