بروک آ سال اٹی زرگزران تا بحالی نا عمل کرار مریک، آئی ایم ایف

اسلام آباد (اے پی پی) جہانی مالیاتی فنڈ(آئی ایم ایف) پارینے کہ اینخو نا سال کساد بازاری نا حالیت آک کساس آتیان زیات مننگ نا گمان ءِ وخت اس کہ بروک آ سال اٹی زرگزران تا بحالی نا عمل کرار مریک۔ داہیت ءِ جہانی مالیاتی فنڈ انا چیف اکانومسٹ گیتاگوپی ناتھ تینا اسہ انٹرویو اسے ٹی پارینے، اوپارے کہ اینخو دنیا نا چندی بشخ آتے ٹی لاک ڈاون نا وخت و ترندی ننا کساس آتیان زیات مرغن مسنے، ہنداوڑ کوروناوائرس نا دین انا داسکان طبی ایسری اس کشنگتنے۔ ہرانا سوب آن داسال انا بروک آ تُوتیٹی راجی مری ءِ اختیار کننگ نا چرجوئی برجاسلک۔ داکان بیدس داوخت اسکان داوائرس نا ویکسین مون آ بتنے، ملک آک ٹیسٹ کننگ نا لائخی و وائرس نا ساڑی مننگ نا پیدواری نا ٹک آتا بابت ہم پدی ءُ ، داحالیت آتے ٹی زرگزران تا بحالی بے پک ءِ۔ اوپارے کہ داحالیت آک ہمو نیزگار و پسماندہ ملک آتے کن خاص کر فریشانی نا سوب مریک ہرافک پیشن نا وام ہلکونوو اوفتا ادائیگی ءِ کروئی ءِ، جہانی مالیاتی فنڈ دا ملک آتے کن وام تیٹی رعایت، وام تا ری اسٹرکچرنگ، رعایتی وام و امداد نا فراوانی نا کمک اٹ باسک ملک آتا کمک ءِ کننگ ءِ۔ گیتا گوپی ناتھ پارے کہ پڑک۔ 20 نیزگار و پدتموک ملک آتے کن وام تیٹی رعایت نا رداٹ جہانی مالیاتی ادارہ غاتون کاریم کننگ ءِ۔ اسہ سوج اسے آ اوپارے کہ کوروناوائرس نا دین انا زرگزرانی زہم تے کم کننگ کن گیشتر ملک آک کمکی پیکج تسنو ہرا ستاکڑزک ولے داڑتون اوار اوار ملک آک دا بشخ آتے ٹی روزگار نا فراوانی کن کاریم کیر ہراڑے مون آ بروک آ حالیت آتے ٹی ودکی نا گنجائشت ارے۔ ملک آک گرین و ڈیجیٹل ٹیکنالوجی نا کچ آن فائدہ ہرفر۔