ترکی بحیرہ روم،اسود و ایجین نا تینا حق آتے امر کہ مرے ہلیک، طیب اردگان

انقرہ(آن لائن) ترک صدر رجب طیب ایردوان پارینے کہ ترکی بحیرہ روم، بحیرہ اسود و بحیرہ ایجین نا تینا حق آتے امر کہ مرے ہلیک، اگہ کس اسے ٹی ننا مقابلہ ءِ کننگ نا جرت ارے تو مون آ برے نہ تو ننا کسر آن اینگ مرے۔ ایردوان اسہ دود اسے ٹی تران نا وخت آ دے ٹکی بحیرہ روم نا بابت تینا خیال آتا درشانی ءِ کرسا پارے اگہ نن پانہ تو ہندن کینہ او واقعی ہندن کینہ۔ ہرانا نن ہرجانہ ءِ ہم ادا کینہ، نہاد آتے تننگ کن تینا کاٹم تے تروک آتا اُست خواہک تو ننا مون آ بریر، نہ تو ننا مون آ اینگ مریر۔ صدر ایردوان پارینے کہ بازنطینی نا وارث مننگ نا ہم حقدار مفروک آتا اینو یورپی تے تینتون اوار کرسا غیر حق بجانب، غیر کانودی کارروائی نا کسر ءِ ہلنگ اونا مُست آن سبخ ہلپننگ نا کنڈ آ اشارہ کیک۔ او پارینے کہ ترکی نا کس اسے نا ڈغار، حاکمیت، مفاد  آتیا نظر اف ولدا ہم دا تینا ملکیت مروک آ گام گیج آتیا ہچ ءُ وڑ اسے ٹی پدی مفک۔ تینا بنوک آتے تینے سہی پاننگ او تینا نَت تیا تفر ءِ خلنگ آمبار انگا ردی تیان مُر مننگ نا دعوت ءِ تروک آ جناب ایردوان زور شاغسا پارینے کہ ترکی داسہ صبر، عزم او جسارت نا امتحان ءِ ہلوک ءُ اسہ ملک اس اف، دادے ہر اسٹ ءِ پہہ مروئی تمک۔