سوات و کوہستان اٹ نوکاپ آن بھلو بھسکاری‘17 بندغ ءِ دیر درے

سوات (آن لائن)سوات و کوہستان اٹ نوکاپ بھسکاری کرے، 17 بندغ ءِ دِیر درے، ہرافتیان 9 بندغ نا لاش تے کشانو وخت اس کہ ایلوفتا پٹنگ برجا ءِ۔ ڈپٹی کمشنر سوات ثاقب رضا اسلم نا رداٹ مدین اٹ شاہ گرام او تیرات نالہ ٹی نوکاپ آن کیہی اُرا تے دیر درینے۔ او پارینے کہ جل تیٹی نوکاپ نا سوب آن 40 مکان او رابطہ نا پُل آتون اوار ایلو گڑاتے ہم بھاز نسخان رسینگانے۔ کوہستان نا مُر انگا خلق لائچی جل اٹ بھلو کچ اسے نا نوکاپ بھسکاری کرینے۔ وخت اس کہ نوکاپ اٹ اسہ خاہوت نا ہفت بندغ ءِ دِیر درینے۔ کوہستان پولیس نا رداٹ دا وخت اسکان مسہ نیاڑی نا لاش ہم ملانے وخت اس کہ چُنا تتون اوار 4 بندغ داسکان گم ءُ۔ ایلو کنڈ آ چلاس اٹ شاہراہ قراقرم آ سلوک آ دیر آن لال پڑی نا نیام اٹ لینڈ سلائیڈنگ آن کیہی گاڈی تے نسخان رسینگانے او کرود اسے نا تمنگ آن ٹینکر نا ڈرائیور تپاخت کرینے۔ شاہراہ قراقرم آ لینڈ سلائیڈنگ نا سوب آن ٹریفک معطل مسنے، شاہراہ نا بند مننگ آن ہندی بندغ او سیلیک ہڑتوم آ کُنڈ آتیا اختہ مسنو۔