امن نا پک کننگ و السی ویل آتا ایسری اولیت آتیٹی اوار ءِ،کمشنر لورالائی ڈویژن

کمشنر لورالائی ڈویژن ولی محمد بڑیچ تون پشتونخوا نیشنل عوامی پارٹی نا ضلعی صدر مصطفیٰ کمال کاکڑ نا کماشی ٹی اسہ ڈل اس اونا دفتر اٹی اوڑدہی کرے۔ اوڑدہی نا وخت آ ضلع لورالائی ٹی امن و ایمنی نا جم حالیت، برجا شونداری ڈٹ و الس ءِ مون تروک بنداوی ویل آتیا سرجم سجفنگا۔ ڈل کمشنر ءِ ضلع ٹی جانجوڑی، سفا انگا دیر، بجلی نا فراوانی و ایلو بنداوی آسراتی تتون تعلقدار السی خواری تیان معلومدار کرے۔ داڑان بیدس لورالائی شار اٹی بی ایس ڈی آئی نا رِد اٹ برجا شونداری ڈٹ آتا پیش رفت، آب و وخت آ پوروی نا بابت ہم گپ و تران مس۔ ڈل ضلعی انتظامیہ نا کنڈ آن السی ویل آتا ایسری، امن و ایمنی‘ شونداری سرجز آتیٹی است خواہی تا ستاءِ کرسا اومیت درشان کرے کہ السی آسودہی نا ڈٹ آتیا عملدرآمد ءِ پین ترند کننگک۔ دا وخت آ کمشنر لورالائی ڈویژن ولی محمد بڑیچ ڈل ءِ باور کرفے کہ ضلعی انتظامیہ الس نا جان و مال انا رکھ، مدامگی امن نا برجائی و السی ویل آتا ایسری ءِ تینا اولیکو اولیت آتیٹی اوار کرینے، او پارے کہ امن و ایمنی آ ہچ ءُ وڑ اسے نا سمجھوتہ کننگپک و کانود نا حکمرانی ءِ امر کہ مرے پک کننگک۔ کمشنر مستی پارے کہ حکومت بلوچستان السی آسودہی نا ڈٹ آتا وخت آ پوروی کن عملی گام گیج کننگ اٹی ءِ‘ وخت اس کہ شونداری اسکیم آتیٹی شفافیت، آب و السی گرج آتے اولیت تننگ انگ اٹی ءِ۔ او پیدوار کرے کہ آخبت اٹی ہم ہند آ ڈٹ آتے اولیت نا بنداو آ اوار کننگک ہرافتیان الس نا بھلو کچ اس دراست راست فائدہ ہرفے و علاقہ نا جم شونداری ٹی مثبت کڑد ادا کے۔ اوڑدہی نا گڈسر اٹی ڈل انتظامیہ تون ہر وڑ انا کمک نا باوری کرفے، وخت اس کہ کمشنر پارے کہ السی نمائندہ، سیاسی پارٹی و ضلعی انتظامیہ نا تین پہ تینی کمک آن الس ءِ جوان آسراتی تا فراوانی و مدامگی شونداری نا ہدف آتے دوئی کننگ مریک۔ لورالائی (میر محمود بلوچ)