پاکستان و امریکہ نا تعلقداریک پین سوگو مرسا ہننگ اٹی ءُ،نائب وزیر اعظم اسحاق ڈار

نائب وزیراعظم و وزیر خارجہ محمد اسحاق ڈار پارینے کہ پاکستان و امریکہ نا تعلقداری تے ٹی پیش رفت مننگ اٹی ءِ و ہڑتوم آ ملک آتا اسٹریٹجک شریدری پین سوگو مننگ اٹی ءِ۔ امریکی کانگریسی ڈل و کاروباری نمائندہ غاتتون ہیت وگپ کرسا اسحاق ڈار پارے کہ بڑزکو کہول آ حال حوال پاکستان و امریکہ تعلقداری تا نمان خصوصیت ءِ‘ او پارے کہ امریکی وزیر خارجہ مارکو روبیو تون 2 اوڑدہی تیٹی ہڑتوم آ کنڈ انا تعلقداری، واپار و علاقائی حالیت آتیا جم گپ وتران مس۔ وخت اس کہ ہڑتوم آ ملک آک تعلقداری تے پین سوگو بنداو کننگ کن پرعزم ءُ۔ او پارے کہ پاکستان و امریکہ نا نیام اٹی پارلیمانی رابطہ نا اہمیت مہالو آن زیات مسنے و امریکی کانگریس ہڑتوم آ ملک آتا تعلقداری تا شون اٹی اہم کڑد ادا کرسا بسنے۔ او پارے کہ پاکستان و امریکہ علاقائی امن، سوگوی و شونہالی کن اسیجا کاریم کننگ اٹی ءُ، وخت اس کہ صدر ڈونلڈ ٹرمپ نا انتظامیہ تدوک آ سال پاکستان و بھارت نا نیام اٹی جنگ بندی ٹی کمکاری کرے۔ او مستی پارے کہ اسلام آباد مفاہمتی یادداشت آ دستخط برجا سال جون اٹی مس۔ اسحاق ڈار پارے کہ امریکہ پاکستان نا کل آن بھلا سنگل کنٹری برآمدی منڈی ءِ و تدوک آ مالی سال ہڑتوم آ ملک آتا نیام اٹی واپار نا کچ 9.4 ارب ڈالر آ سرمس‘ ہرادے بروک آ 5 سال اٹی 20 ارب ڈالر اسکان ودفنگ مریک۔ او پارے کہ پاکستان امریکی پٹی و سویابین نا بھلا درآمد کروک آتے ٹی ءِ وخت اس کہ امریکی ہائیڈروکاربنز کن ہم اسہ اہم ءُ منڈی اسے نا وڑ اٹ مون آ بننگ اٹی ءِ۔ او پارے کہ دا وخت آ پاکستان اٹی 80 آن زیات امریکی کمپنی کاریم کننگ اٹی ءُ و کیہی امریکی کمپنیک ٹیکنالوجی، معدنیات، توانائی و دفاع نا بشخ آتیٹی زرکاری نا وارخواہی تا جاچ ءِ ہلنگ اٹی ءُ۔ نائب وزیراعظم دا ارادہ نا دوارگی ءِ کرے کہ پاکستان ہیت و گپ، سفارتکاری و جھیڑہ غاتا پرامن ایسری نا پالیسی آ عمل ءِ برجا تخک۔