نیشنل ڈیزاسٹر مینجمنٹ نا دیوان، بشام و نوکاپی حالیت آتا رد اٹ کل ادارہ غاتے ہلہلہ ئی تیاری کننگ نا پارت

این ڈی ایم اے نا دیوان اٹی ملک اٹی برجا بشام نا پِر و گمانی نوکاپی حالیت آتا رد اٹ کل تعلقدار ادارہ غاتے پورو تیاری برجا تخنگ و ہلہلہ ئی حالیت آتتون مون توننگ کن بھرمی رابطہ کاری ءِ پک کننگ نا پارت کننگا‘ وزیراعظم نا کماشی ٹی بشام نا پِر و نوکاپی حالیت آتا جاچ دیوان اٹی این ڈی ایم اے، صوبائی حکومت و تعلقدار ادارہ غاتا کنڈ آن پوسکن آ نسخان، ریسکیو، ریلیف و بحالی نا گام گیج آتیا سرجم بریفنگ تننگا۔ وزیراعظم پارت کرے کہ این ڈی ایم اے، پی ڈی ایم ایز و صوبائی حکومت آتتون پدریسہ رابطہ اٹی مرے و بشام نا حالیت، گمانی پِر و گمانی خطرہ غاتتون تعلقدار حوال ءِ مچ آ بنجائی و صوبائی ادارہ غاتیا وخت آ سر کننگے۔ او پارے کہ کل ادارہ غاک بشام نا برجا ریسہ ٹی ہر وڑ انا ہلہلہ ئی حالیت اسے تون مون تننگ کن مدام تیار مریر۔ وزیراعظم بنجائی وزیر ڈٹ بندی ءِ پارت کرے کہ او ہڑدے ئی بنداو آ فلڈ کمیٹی نا دیوان نا کماشی ءِ کے، حالیت آتا جاچ ءِ ہلے و آخبت نا سم پام ءِ بھرمی وڑ اٹ نافذ کننگے۔ وزیراعظم قطبی علاقہ غاتیٹی گلیشیر جھل تا دیرا تنگ‘ (گلوف) و طوفانی نوکاپی دیر تا خطرہ غاتا رد اٹ پیشگی حوال آتا نظام ءِ پورو فعال تخنگ نا پارت کرے۔ او پارے کہ پاکستان نا جہانی چاگڑد دشمن گیس آتا اخراج اٹی بشخ بھاز کم ءِ‘ ولے موسمیاتی بدلی نا منفی زہم تیان پاکستان بھاز خراب وڑ اٹ زہمی مننگ اٹی ءِ۔ او پارے کہ موسمیاتی بدلی نا چیلنج آتا رد اٹ حکومت مریس وختی‘ نیامی و کم وختی گام گیج آتیا ترندی اٹ کاریم کننگ اٹی ءِ وخت اس کہ این ڈی ایم اے کل ادارہ غاتا کمک اٹ برجا بشام نا اسپیل اٹی جانی و مالی نسخان ءِ کم آن کم کننگ کن گام گیج آتے پک کے۔ دیوان ءِ این ڈی ایم اے، گلگت بلتستان، آزاد کشمیر و ہر چار آ صوبہ غاتا چیف سیکرٹریک بشام نا پِر، نسخان، ریسکیو و بحالی نا گام گیج آتیا بریفنگ تسر۔ بریفنگ اٹی پاننگا کہ ساڑی بشام نا اسپیل اٹی داتم اسکان 110 بندغ زوال وخت اس کہ 360 ٹھپی مسنو، وخت اس کہ 796 ماڑی تے نسخان رسینگا و 376 مال ساہدارک کسکر۔ این ڈی ایم اے قطبی علاقہ غاتیٹی نوکاپی حالیت وخت اس کہ سندھ و بلوچستان اٹی بھاز باسنی نا ریسہ تون مون تننگ کن صوبائی حکومت و تعلقدار ادارہ غاتے کمک و وسیلہ فراوان کننگ اٹی ءِ۔ دیوان ءِ پاننگا کہ بروک آ اِرا دے اٹی آزاد کشمیر، گلگت بلتستان و سویلی سندھ اٹی بشام نا پِر انا اسہ بھلو اسپیل اسے نا گمان ارے، وخت اس کہ ستمبر نا ارٹمیکو ہفتہ غان مچ آ ملک اٹی بشام نا پین اسہ بھلو ریسہ اسے نا اومیت ءِ۔ بریفنگ اٹی پاننگا کہ جہانی کہول آ موسمیاتی بدلی نا زہمک و ایل نینو نا سوب آن قطبی علاقہ غاتیٹی گلیشیر آتا دیر مننگ اٹ ودکی مسنے، ہراڑان بروک آ اسہ تُو اٹ گلوف و نوکاپ نا بھاز خطرہ ارے۔ گمانی زہمی علاقہ غاتا نشاندہی ءِ کرسا رکھی گام گیج کننگ انگ ءِ۔