سینیٹ دیوان، پاکستان آرمی ایکٹ تون اوار مسہ بل منظور

اسلام آباد :  سینٹ پاکستان آرمی ایکٹ تون اوار مسہ بل ءِ گیشتری سلاہ اٹ منظور کرے‘ پاکستان آرمی نا توہین کننگ و فوج ءِ بدنام کننگ آ اِرا سال بندی و ڈنڈ انا سزا مریک، پیپلز پارٹی نا سینیٹر میاں رضا ربانی و سینیٹر مشتاق احمد خان بل انا مخالفت وخت اس کہ تحریک انصاف نا باسک آک برانز کرسا واک آؤٹ کریر، سینیٹر میاں رضا ربانی بل تے پیش کننگ ناعمل کور کانود جوڑ کننگ گوندسا ایوان آن ٹوکن واک آؤٹ کرے‘پنچ شنبے نا دے سینٹ نا دیوان ناوخت آ بنجائی وزیر دفاع خواجہ آصف پاکستان آرمی ایکٹ 1952 اٹ پین ترمیم نا بل اتون اوار کنٹونمنٹ بورڈ ایکٹ و ڈیفنس ہاؤسنگ اتھارٹی ایکٹ اٹ پین ترمیم نا بل آتے پیش کرے‘ دا وخت آ سینیٹر میاں رضا ربانی پارے کہ ہرا بل آتے پیش کننگ انگ ءِ داٹی ایچ ای سی نا بابت ہرا بل ءِ او غیر آئینی ءِ دا بل ءِ اگہ منظور کروئی ئس تو بایدے دادے سی سی آئی آن منظور کننگوسس۔ چیئرمین سینٹ پارے کہ دا بل ءِ پد بٹنہ۔ داوخت آ تحریک انصاف نا سینیٹر محمد ہمایون مہمند پارے کہ پارلیمنٹ نا اسیجائی سیشن نا وخت آ بنجائی وزیردفاع ہرا ہیت آتے کریسس اوڑا بشخنداری کے اگہ او بشخنداری کپک تو نن اونا اسہ ہیت اسے ہم بنپنہ۔ دا وخت آ تحریک انصاف نا باسک آک برانز کرسا ایوان آن واک آؤٹ کریر‘ بنجائی وزیر دفاع خواجہ آصف پاکستان آرمی ایکٹ 1952 اٹ پین ترمیم نا بل ءِ پیش کرے‘ بل انا متن نارد اٹ سرکاری وڑ اٹ ملکی سلامتی و فائدہ نا وڑ انا معلومداری تے پاش کننگ آ 5 سال نا سخت سزا تننگک‘ آرمی چیف یا واکدار افسر نا موکل آن پد پاش کروک آتے سزا مفک‘ ترمیمی بل اٹ مستی پاننگانے کہ پاکستان و پاک فوج انا فائدہ غان چَپ ہیت آتے پاش کروک آنا برخلاف آفیشل سیکرٹ ایکٹ و آرمی ایکٹ انا رد اٹ کارروائی کننگک۔ بل انا رد اٹ دا کانود ناشیف اٹ بروک بندغ سیاسی سرجز آتے ٹی بشخ ہلنگ کپک‘ حساس ڈیوٹی آ سلوک بندغ 5 سال اسکان سیاسی سرجز آتے ٹی بشخ ہلپک وخت اس کہ سیاسی سرجز آتے ٹی بشخ ہلنگ نا رکھ انا خلاف ورزی کننگ آ 2 سال نا سزا مریک‘ بل انا رد اٹ الیکٹرانک کرائم نا زموار بندغ‘ ہرانا مسخت پاک فوج ءِ بدنام کننگ مرے تو اونا برخلاف الیکٹرانک کرائم نا رد اٹ کارروائی مریک۔ بل اٹ مستی پاننگانے کہ فوج ءِ بدنام کننگ یا اونا برخلاف بدبیسئی تالان کننگ آ آرمی ایکٹ انا رد اٹ 2 سال بندی و ڈنڈ مریک پیپلز پارٹی نا سینیٹر میاں رضا ربانی و جماعت اسلامی نا سینیٹر مشتاق احمد خان بل انا مخالفت ءِ کریر ولے چیئرمین سینٹ باسک آتیان بل آ ہر ٹک آ سلاہ ہلنگ آن پد گیشتری ناسلاہ اٹ اودے منظور کرے۔ بنجائی وزیر دفاع خواجہ آصف ڈیفنس ہاؤسنگ اتھارٹی ایکٹ 2013 اٹ پین ترمیم کننگ نا بال ءِ پیش کرے‘ ہرادے چیئرمین سینٹ باسک آتیان سلاہ ہلنگ آن پد گیشتری سلاہ اٹ منظور کرے۔

(آن لائن)