قر آن پاک نا بے شرفی نا برخلاف یو این جنرل اسمبلی ٹی قرارداد منظور

نیویارک :  اقوام متحدہ نا جنرل اسمبلی قرآن پاک نا بے حرمتی نا واقعہ‘ خار تالان کروک تران‘ مقدس آ ہند‘ مذہبی علامت آتا برخلاف جلہو تے توننگ ومذمت نا بابت پاکستان نا کمک اٹ مراکش نا پیش کروک قرارداد نا منظوری ءِ تس۔ مراکش پاکستان نا کمک اٹ خار تالان کروک تران تا مون ءِ توننگ کن بین المذاہب و بین الثقافتی مکالمہ و رواداری ءِ شون تننگ نا سرحال آ قرارداد پیش کرے ہرادے 193 باسکی جنرل اسمبلی منظور کرے۔ اقوام متحدہ ٹی تعینات سفارت کار آک پاریر کہ پاکستان ملائیشیا و مصر تون اوار قرارداد ناکماشی ءِ کرے‘ ہرانا مسخت مذہبی ہند‘ نشان و مقدس کتاب آتا تقدس ءِ برجا تخنگ ءِ۔ قرارداد اٹ پاننگا کہ مذہب یا عقیدہ نابنداو آ بیدادی تا کل کارروائی تتون اوار مذہبی علامت، مقدس کتاب، اُرا‘ کاروبار‘ میرات‘ اسکول‘ ربیدہ ئی ہند آتا برخلاف ہر وڑ انا کارروائی و عبادت تون اوار مذہبی ہند‘ مقدس آ ہند‘ مزار و اوفتیا مروک جلہو جہانی کانود آتیان چَپ ءِ ہرانا سختی اٹ مذمت ءِ کننگا۔ اسپین دا پیرا گراف اٹ ترمیم جمع کرفے ہراٹی جہانی کانود آن چَپ پاروک لوز آتے کشنگ نا پاننگا۔ داترمیم نا مخالفت اٹ 62 ومخ تفی ٹی 44 وونٹ تما وخت اس کہ 24باسک سلاہ تننگ اٹ بشخ ہلتوس۔ جنرل اسمبلی قرارداد نا شڑت آتا رد اٹ باسک ملک آتیا زور شاغا کہ ہمو کل تعلقدار اسٹیک ہولڈر تتون بین المذاہب و بین الثقافتی مکالمہ ءِ ودفنگ و اختلاف آتا احترام و قبولیت ءِ پک کیر تاکہ خار تالان کروک تران تا تالانی ءِ توننگ مرے ہرا امتیازی سلوک، دشمنی وبیدادی تے ودفنگ نا سوب مریرہ۔

(آن لائن)