ہمسائے ملک خواپک بلوچستان شون ہلے، شہباز شریف

گوادر :  وزیراعظم شہباز شریف پارینے کہ سنگت ملک آتا کمک اٹ ملک ڈیفالٹ نا گڑتی تیان پیش تمانے‘ ریکوڈک جھیڑہ غا پاکستان نا ارب آروپئی تے زیان کننگا‘ ولے الس نا چنکو فائدہ اس ہم متو۔ تدوک آ دور اٹ گوادر اٹ شونداری ڈٹ آتے پد بٹنگا‘ پاکستان نا ہمسائے دشمن ملک خواپک کہ بلوچستان شون ہلے و سیاسی سوگوی برے‘ ریکوڈک نا جھیرہ غا پاکستان نا ارب آ روپئی تے خلنگا ڈیل مس ولے دادے سپریم کورٹ اٹ چیلنج کننگا‘الس ءِ ہچ فائدہ متو‘گوادر اٹ حقدار ماہی گیر تے کمکی چیک و مارومسڑ طالب علم آتے لیپ ٹاپ تننگ نادود آن تران کرسا وزیراعظم پارے کہ 4جون آ ہراتم گوادر نا دورہ ءِ کریٹ تو دا محسوس مس کہ داڑے ہر گدرینگوک آ سات است جمی ناسوب ئس‘ بلوچستان ءِ اللہ تعالیٰ بے کچ وسیلہ تسنے ولے بدبختی اٹ دا صوبہ ءِ بنداوی وسیلہ غاتیان محروم کننگا‘ تدوک آ سال داڑے بسٹ تو سما تما کہ داڑے گدرینگوک آ چار سال اٹ اسہ ڈٹ اسے آ ہم کاریم متنے‘ ہر گڑاءِ بند کننگا‘ بلوچستان اٹ کنوئی آ دیر و ایران آن بجلی اتنگ نا ڈٹ جوڑ کننگا‘ پنجگور ٹرانسمیشن اتنگ ناڈٹ جوڑ کننگا‘ تدوک آ چار سال اٹ سی پیک ڈٹ آتیا کاریم ءِ توننگا‘ نواز شریف گوادر اٹ بے حساب شونداری ڈٹ آتا بنداو ءِ تخا ولے پی ٹی آئی دور اٹ دا کل ڈٹ آتے پد بٹنگا‘ریکوڈک آ بھلو پیسہ اس خڑچ کننگ آن پد ہراتم ڈیل مس تو اودے ہم سپریم کورٹ اٹ چیلنج کننگا‘ کل ءِ سماءِ کہ الس ءِ اسہ چنکو فائدہ اس ہم متو‘ سوئی گیس، ریکوڈک و سیندک تون اوار بے کچ خزانہ غاک بلوچستان اٹی ءُ‘ بلوچستان نا اس سوج کیک کہ داڑے گوادر بندرگاہ تو جوڑ مس ولے الس کن انت کننگا‘ ای پاوہ کہ اگہ داڑے ڈٹ آک جوڑ مننگءُ تو داٹی فائدہ الس ناءِ‘ ڈٹ آتیان نسخان تو مفننگ ءِ بلوچستان نا الس ءِ داڑان فائدہ مریک۔ او پارے کہ گوادر بندرگاہ جوڑ مس‘ 2015 غان گڈ گوادر بندر گاہ نا سَفائی متنے ہراڑان بھاز ڈکھ مس‘ اینو نن ڈرلنگ نا بناءِ کرینن ہرا فروری ٹی پورو مریک۔ او پارے کہ ننا اسہ سال اٹ داڑے 6لکھ ٹن گڑا بسنے‘ وزیراعظم پارے کہ چین، سعودی عرب و متحدہ عرب امارات سختی نادے تے ٹی نن تون کمک کریر۔ آئی ایم ایف تون معاہدہ مس اینو پاکستان ڈیفالٹ نا گڑتی تیان پیش تمانے‘ بلوچستان نا خزانہ غاتیا اولیکو حق بلوچستان نا الس ناءِ‘ نن حکومت اٹ بننگ تون بلوچستان نا شونداری نافیصلہ کرین۔ وزیراعظم پارے کہ ہرا بندغ آک پاکستان اٹ زرکاری کننگ اٹی ءُ اوفتا رکھ ننا زمواری ءِ۔

(آن لائن)