چیئرمین پی ٹی آئی پیشی تا بابت تل وَل کننگ ءِ، عطاء تارڑ

اسلام آباد :  وزیراعظم نا خصوصی کمکار عطاء تارڑ پارینے کہ پی ٹی آئی نا چیئرمین تینا مقدمہ غاتا پیشی کن تل ول کننگ اٹی ءِ، توشہ خانہ نا ٹیکی تے بلیک مارکیٹ اٹ کبین بہا کننگا‘ چیئرمین پی ٹی آئی اینو ولدا عدالت اٹ پیش متو او نواز شریف ناسوغند آ ملنڈ کریکہ، توشہ خانہ ٹی کل گواہ تا بیانک قلمبند مسنو‘ کیس گڈیکو مرحلہ ٹی سرمسنے‘ توشہ خانہ کیس ءِ خراب کننگ کن برانز نا ڈٹ جوڑ کننگ انگ ءِ۔ اسلام آباد اٹ پریس کانفرنس آن تران کرسا عطاء تارڑ پارے کہ پی ٹی آئی نا چیئرمین عمران خان اینوولدا توشہ خانہ کیس اٹ پیش متو‘ ہراتم توشہ خانہ نا ہیت مریک تو دا باہ ءِ بند کیرہ‘ عمران خان تینا کیس تے ٹی تل ول کننگ اٹی ءِ‘ عمران خان نواز شریف ناسوغند آملنڈ کریکہ اینو اونا تاریخ ئس ولے اودے لاہور آ ہننگ جوان لگا‘ اونا وکیل آک ہڑدے اوڑکن سَفائی پیش کیرہ۔ عمران خان عدالت آتیا زور شاغسا تینا منشاء نا فیصلہ خواہک۔ عطاء تارڑ پارے کہ پاکستان ناتاریخ اٹ بھاز آ سیاستدانک مقدمہ غاتتون مون تسنو‘ مقدمہ غاتے ٹی پیش ہم مرسا کرینو ولے دا اسٹ انگا مقدمہ ءِ ہراٹی دوبہ دار ہڑدے حاضر مفننگ نادرخواست اتیک ہرادے منظور کننگک‘ ای سرپند مفرہ کہ اخس دوبہ دار ءُ ہرافتے دا آسراتی دوئی ارے و پیش مفننگ نا درخواست دمدستی منظور ہم مرے و اوڑتون رعایت ہم کننگے‘ ہراتم پاکستانی شاری اسے نا کیس مرے تو او پیش مف تو اودے سزا ہم رسینگک ولے داڑے ہیت سمجھ اٹ بفک کہ داخس نرمی انتئے کننگ انگ ءِ و مگہ دا آسراتی کل دوبہ دار ہرا پاکستان اٹی ءُ اوفتے رسینگ کیک کہ او ہڑدے پیش مفننگ نا درخواست ایتے و امنا کننگے‘ اونا وکیل آک ہڑدے گارنٹی جمع کرفرہ۔

(آن لائن)