مسلم لیگ(ن) نا کنڈ آن وزیر اعظم عمران خان آن استیفہ نا خواست

 اسلام آباد(آن لائن)پاکستان مسلم لیگ(ن) وزیر اعظم عمران خان آن استیفہ نا خواست کرسا پارینے کہ  عمران خان و پاکستان اسیجا چلینگ کپسہ، بایدے استیفہ ایتے، تحریک انصاف تین کن پین لیڈر اس گچین کے، مچ آ پاکستان خان نا انارکی نا مون اٹی ءِ، دا حالیت آتیٹی عمران خان ءِ پین وارخواہی تننگا تو ملک ہندن ءُُ کھڈ اسے ٹی تمک ہراڑان پیش تمنگ مفک، حکومت ءِ پٹرول 55، 56 روپئی آ رسینگ انگ ءِ، و حکومتی خراج نا سوب آن الس ءِ پٹرول 100 روپئی آ رسینگ انگ ءِ، پٹرولیم کمپنیک 15 روپئی ودکی خواہسرہ، ایلو دہ روپئی ءِ ہرا کھاتہ ٹی تننگ انگ ءِ۔ شنبے نا دے اسلام آباد اٹی میڈیا تون ہیت و گپ کرسا مسلم لیگ(ن) نا راہشون خواجہ آصف حکومت ءِ بھاز شیف خلسا پارے کہ عمران خان 2013ء و 201ء ٹی پٹرولیم مصنوعات نا نہاد آتیٹی ودکی نا بابت ٹوئیٹ کریسس، ہرافتیٹی او پٹرولیم نہاد آتیٹی ودکی نا بابت بھلو خار اسے نا درشانی کریسس۔ او پارے کہ عمران خان پاہک پین و کیک پین، دے نیام آ بیانک تے بدل مریرہ۔ حکومت 30 جون نا ہم انتظار ءِ کتو و ننوئی نن اسہ وار آ پٹرولیم مصنوعات نا نہاد آتیٹی 25 روپئی فی لیٹر ودکی کرے، ہرا الس آ بیداد و ظلم اسے۔ او پارے کہ پٹرول نا نہاد آک ودرہ تو ملک اتی کبینی نا طوفان بریک۔ عمران خان ءِ زیات وارخواہی تننگا تو پاکستان ہندن ءُُ جاگہ اس کاہک، ہراکان پدی بننگ مفک۔ پاکستان و عمران خان اسیجا چلینگ کپسہ، و نئے ملک ءِ چلیفنگ نا اوٹی لائخی ارے۔ مچ آ پاکستان خان انا انارکی نا مون اٹی ءِ۔ او پارے کہ عمران خان تینا نابودی ءِ امنا کرسا دمدستی استیفہ ایتے و پاکستان تحریک انصاف تین کن یپن راہشون اس گچین کے۔ مسکوہی وزیر اعظم شاہد خاقان عباسی پارے کہ پٹرولیم مصنوعات نا نہاد آتیٹی نن نا تہاری ٹی ودکی گڑتی نا ہیت اسے۔ ننا دور اٹی پٹرول 70 ڈالر فی بیرل ئس، پٹرول نا نہاد اٹی 34 درسَد ودکی ءِ منپنہ۔ پٹرول نا نہاد اٹی 34 درسَد ودکی کرسا الس آ ودکی باریم تخنگانے۔ حکومتی خراج نا سوب آن پٹرول ءِ 100 روپئی کننگانے۔ حکومت ءِ پٹرول فی لیٹر 55، 56 روپئی آ رسینگ انگ ءِ، وخت اس کہ 44 روپئی خراج خلنگانے، حکومت پٹرولیم نا نہاد آتے ودفسا اودے الس نا ہلنگ نا وس آن پیشن کرینے، حالانکہ پٹرول نا حقی نہاد 67 روپئی فی لیٹر جوڑ مریک، پٹرولیم کمپنیک 15 روپئی فی لیٹر ودکی نا خواست کریسر۔ دا ہیت ہبکہ کننگ نا سوب ءِ کہ دہ روپئی زیات ودفنگ نا مطلب نت ءِ؟ او پارے کہ حکومت خراج ہدف آتے دوئی کننگ و زرگزران ءِ سیبو تننگ اٹ اسُل بے سہب مسنے۔ نن حکومتی نابودی نا مقدمہ ءِ الس نا مون آ تخانن، مسکوہی وزیر اعظم نا پاننگ ئس کہ دن انگا بدلی نا کوپہ مفنہ ہرا جمہوریت کن نسخان نا سوب مرے، دا وخت آ احسن اقبال پارے کہ عمران خان نا ریٹائرمنٹ نا وخت بسنے، حکومت پٹرول نا نہاد آتیٹی ودکی کرسا الس نا پٹی ٹی خنجر اس خلکنے۔ پٹرول نا نہاد آتیٹی ودکی ءِ ہچ گہس منپنہ۔