پٹرول نا نہاد آتیٹی ودکی المی ئس، حکومت

اسلام آباد (مانیٹرنگ ڈیسک/ آن لائن) بنجائی وزیر توانائی عمر ایوب پیٹرولیم مصنوعات نا نہاد آتیٹی ودکی نا سوب جہانی منڈی ٹی خام تیل انا انہاد آتیٹی ودکی و روپئی نا قدر انا کمتی ءِ گوندانے، ٹوئٹر آ جاری کروک بیان اٹی عمر ایوب پارے کہ پیٹرول نا نہاد آتیٹی ودکی مجبوری ءِ۔ مون نا تُو جہانی منڈی ٹی خام تیل انا نہاد آتیٹی بھلو ودکی اس مس، و ڈالر نا مون اٹ روپئی نا قدر اٹی ہم مسہ روپئی نا کمتی مس۔ بنجائی وزیر پارے کہ دا سوب آن پٹرول نا نہاد اٹی 31 روپئی 58 و ڈیزل نا نہاد اٹی 24 روپئی 31 پیسہ ودکی کروئی ئس، ولے حکومت پٹرول نا نہاد اٹی 25 روپئی 58 پیسہ و ڈیزل نا نہاداٹی 21 روپئی 31 پیسہ ودکی کرے۔ عمر ایوب پارے کہ پیٹرولیم مصنوعات آتا نہاد آتیٹی ودکی آن پد ہم برصغیر اٹی پاکستان اٹی تیل انا نہاد آک کل آن کم ءُُ۔ بنجائی وزیر تینا ٹوئٹ اتی ایشیا نا چندی ملک آتے پیٹرولیم مصنوعات آتا نہاد آتا پاکستان اٹی نہاد آتتون بیٹ تس، یات سلے تدوک آدے وزیراعظم عمران خان پیٹرولیم مصنوعات نا نہاد آتیٹی ودکی نا سمری ءِ منظور کرے، ہراڑان پد وزارت خزانہ پیٹرولیم مصنوعات نا نہاد آتیٹی ودکی نا نوٹیفکیشن جاری کرے، ہرانا رد اٹ پٹرول نا نہاد اٹی بیست و پنچ روپئی آن زیات ودکی کننگانے۔ ایلو کند آ وزیر اعظم نا خصوصی کمکار زلفی بخاری مچ آ ملک اٹی پیٹرولیم مصنوعات نا نہاد آتیٹی ریکارڈ ودکی آ ٹویٹ کرسا پارے کہ پاکستان اٹی پٹرول نا نہاد آک داسہ ہم بھاز کم ءُُ۔ سرجم حوال آتا ر داٹ ننوئی نن پٹرول نہاد آتیٹی بھلو کچ اسے ٹی ودکی آ السی برانز نا رد عمل اٹی زلفی بخاری تینا ٹوئٹ اٹ پیٹرول نا نہاد آتے جنوری نا تُو انا نہاد آتتون بیٹ ترسا نوشتہ کرے کہ جنوری آن چَپ پٹرول 17 و ڈیزل 26 روپئی فی لیٹر اڑزان ءِ۔ زلفی بخاری نا مؤقف ئس کہ یک و نیم تُو اٹی دنیا ٹی پٹرول نا نہاد آتیٹی 112 درسَد ودکی مس، ولے ننا ملک اٹی پٹرول نا نہاد آتیٹی بیرہ 23 درسَد ودکی مسنے۔