اختر مینگل ءِ خوش کننگ کن حکومت نا کنڈ آن شش ٹِک آ عملدرآمد نا بنا

اسلام آباد (آن لائن)بلوچستان کن بنجا ٹی 6 درسَد ملازمت کوٹہ غا عملددر آمد نا پارت جاری کرینے، وزیر اعظم ہاؤس نا کنڈ آن نوٹیفکیشن جاری کننگانے، سرجم حوال آتا رد اٹ بی این پی نا سروک اختر مینگل نا حکومت آن جتائی آن پد بنجائی حکومت نا کنڈ آن سیوتی جماعت بی این پی ءِ خوش کننگ نا کوشست آک تیز کننگانو، دا رد اٹ حکومت بلوچستان نیشنل پارٹی مینگل نا شش ٹِک آ تالان ایجنڈا غا عملددر آمد بنا کرینے، وزیر اعظم آفس آن جاری نوٹیفکیشن نا رد اٹ بلوچستان کن 6 درسَد کوٹہ غا سختی اٹ عملدرآمد کننگ کن وزیراعظم عمران خان غٹ بنجائی وزارت، محکمہ غاتے پارت کرینے، کوٹہ ءِ پک کننگکن اسہ تُو اسے ٹی خورک اسامی تا ریکارڈ ءِ تننگ نا پارت ہم کننگانے۔ نوٹیفکیشن اٹی پاننگانے کہ مملکت پاکستان نا آئین نا آرٹیکل27 غٹ تپہ و علاقہ غاتا سرکاری اسامی تے کن نمائندگی نا اہمیت ءِ امنا کیک، آئین نا دا ٹِک ءِ مون آ تخسا علاقائی، صوبائی کوٹہ نا نوٹیفکیشن جاری کننگانے، ہرانا رد اٹ بلوچستان آن تعلقدار بندغ آتے کن بنائی وڑ اٹ بنجائی حکومت اٹی اسامی تیا تقرری کن شش درسَد کوٹہ جتا کننگانے، دا رد اٹ بنجائی حکومت نا تعلقدار وزارت و ڈویژن آتے عملدرآمد ءِ یقینی کننگ نا پارت کننگانے۔ نوٹیفکیشن نا رد اٹ وزیر اعظم دا باندات نا اسُل سنجیدہ وڑ اٹ جاچ ءِ ہلک، و اونا است خواہی ءِ کہ بنجائی حکومت نا غٹ وزارت و ڈویژن آک زُوت آن زُوت دا پرمان تیا عملدرآمد ءِ پک کیر، و وزیر اعظم غٹ وزارت آتے پارت کرینے کہ بلوچستان کن تخنگوک کوٹہ نا بابت 30 جون 2020ء اسکان ہر اسہ ڈویژن، وزارت، محکمہ، سرکاری و نیم سرکاری ادارہ غاک بلوچستان کن دوئی اسامی تے کن حساب و معلومداری تے مچ کیر و غٹ محکمہ و وزارت آک 30 دے اٹی اسٹیبلشمنٹ ءِ دا معلومداری تے سر کیر، اوکان پد اسٹیبلشمنٹ ڈویژن اسہ پورو ءُُ رپورٹ اس جوڑ کیک، و دا رد اٹ تینا سلاہ سوج آتتون اوار رپورٹ اس وزیر اعظم نا مون آ تخک۔