نیزگار ڈیہہ تا گرج آتیا زیات چکار المی ءِ، چیئرمین این ڈی ایم اے

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نا چیئرمین لیفٹیننٹ جنرل انعام حیدر ملک پائیدار شونداری ہدف آتا دوئی کننگ کن تعلقدار شریدار آتا نیام اٹ تین پہ تینی کمکاری نا اہمیت آ زور شاغسا پارینے کہ آفت آتون مون تننگ نا کوشست آتیٹی نیزگار ڈیہہ تا گرج آتیا زیات چکار کننگ المی ءِ۔ داخیال آتا درشانی ءِ او ایشیا پیسفک فورم پائیدار شونداری نا دہ می سالانہ دیوان آن تران کرسا کرے، دا دیوان 27 آن 30 مارچ 2023 آ اقوام متحدہ نا کانفرنس سینٹر (یواین سی سی) بنکاک اٹی برجاءِ۔ چیئرمین این ڈی ایم اے، لیفٹیننٹ جنرل انعام حید رملک و ممبر ڈیزاسٹر رسک ریڈکشن (ڈی آر آر) این ڈی ایم اے ادریس محسود دیوان اٹی شریک ئسر۔ بنجائی وزیر ڈٹ بندی و خصوصی گام گیج پروفیسر احسن اقبال دود اٹی پاکستانی ڈل انا کماشی ءِ کننگ اٹی ءِ۔ دیوان نا مسخت کورونا دین آن بچفنگ ءِ پک کرسا و ایشیا و پیسفک اٹی غٹ کہول آتیا پائیدار شونداری نا 2030 ایجنڈا نا پورو نفاذ ءِ۔ سے شنبے نادے آ این ڈی ایم ایآن جاری پریس ریلیز نا رداٹ چیئرمین این ڈی ایم اے ایس ڈی جیز نا نفاذ اٹی کمکار کانود ساز اسمبلی نا کڑد و جہانی پروٹوکول نا رداٹ ہندی قومی شونداری ہدف تیار کننگ نا پاکستان نا ڈٹ آتے مون آ تخا۔ اوحکومتی نمائندہ، سول سوسائٹی و تنظیم تا چاہندار آتیا زور شاغا کہ او ایس ڈی جیز نا دوئی کننگ کن تین پہ تینی کمکاری اتون کاریم کیر۔ چیئرمین این ڈی ایم اے اولیکو ہدف نا اہمیت نا ہم خاکہ اس پیش کرے ہرا نیزگاری نا چٹفنگ آ چکار کیک و غٹ ایس ڈی جی تا دوئی کننگ نا بنداو تخک۔ اوخور و توانائی نا رکھ انا دمدستی گرج آتا بارواٹی گپ وتران کرے کہ جغرافیائی سیاسی فائدہ غاتیان ایڑتر دا گرج آتسکان رسینگ ءِ امر ممکن کننگ مریک۔ اوجہانی ڈیزاسٹر رسک ریڈکشن (ڈی آر آر) فنانسنگ فنڈ اس جوڑ کننگ نا سفارش کرے ہرانا مسخت خطرہ ونزوری آن زہمی ملک آتے کمک فراوان کننگ ءِ، دُن کہ شام و اوغانستان ہراغٹ آن زیات خطرہ غاتا گواچی ءُ ولے جہانی امداد نا بابت غٹ آن زیات گوجالنگانو۔ چیئرمین این ڈی ایم اے سوگو و محکم انشورنس نا کمک اٹ زرکاری نا رکھ انا اہمیت آ زور شاغسا پارے کہ آفت آتون مون تننگ نا کوشست آتیٹی نیزگار ملک آتا گرج آتیا زیات چکار کننگ المی ءِ و دادے کمکی جاچ انا الجھن اٹ بایدے شاغنگپ۔

(اے پی پی)