ارشد شریف نا خون ڈٹ بندی آخا رد اٹ مسنے، کینیائی کمامدار

خون نا ڈٹ بندی نا ہچ ءُ شاہدی اس ملتو، ارشد شریف آ کہنگ آن مست و پد بیداد متنے

0

Get real time updates directly on you device, subscribe now.

نیروبی : کینیا نا کمامدار آک پاکستان نا سنیئر صحافی و اینکر ارشد شریف نا خون اٹ ہر وڑ انا ڈٹ بندی ءِ رد کرسا دا دعویٰ کرینو کہ ارشد شریف نا خون نا ڈٹ بندی نا ہچ ءُ شاہدی اس ملتنے‘ نئے ارشد شریف آ کہنگ آن مست و پد بیداد کننگانے، ارشد شریف نا خون درست کپننگ ناسوب آن مسوسس۔ کینیا نا سرکاری جاست پاستی رپورٹ اٹ پاننگانے کہ پاکستانی صحافی ارشد شریف نا خون درست کپننگ ناسوب آن مسوسس‘ ارشد شریف آ کہنگ آن مست وپد ہچ ءُ بیداد اس متنے۔ سرکاری حوالی نا رد اٹ کینین کمامدار آتا رپورٹ اٹ نوشتہءِ کہ ارشد شریف نا خون نا ڈٹ بندی نا شاہدی رسینگ تنے‘ ارشد شریف آ ہچ ءُ بیداد اس ہم متنے۔ رپورٹ نا رد اٹ خرم احمد ناگاڈی ءِ روڈ بلاک آ سلفپننگ آ پیرا ملٹری جنرل سروس سم کاری کرے۔ پیرا ملٹری جنرل سروس نا 4 باسک سم کاری کریر‘ حوالی نا رد اٹ سم کاری کروک جی ایس یو نا افسر آک نشہ ٹی الوس‘ وخت اس کہ کینین پولیس بنائی رپورٹ اٹ پاریسس کہ واقعہ نا زموار ہرچار آ افسر زیات شراب کنگوسر۔کینین کمامدار آتا رپورٹ نا رد اٹ ارشد شریف نا گاڈی آن سم کاری متنے‘ اسہ افسر اس تینا سنگت نا سم انا لگنگ آن ٹھپی مسوسس۔ گاڈی نا ڈیور و خرم احمد ارشد شریف ءِ ٹھپی حالیت اٹ وقار احمد نا فام آ سر کریر۔ کینین کمامدار آتا رپورٹ اٹ بے پرواہی اٹ سم کاری کروک اِرا افسر نابرخلاف کارروائی نا سلاہ تننگانے‘ واکداری تے سٹی کاریم اٹ اتنگ آ افسر آتے عمر قید نا سزا مننگ کیک وخت اس کہ واقعہ نا زموار ہر چار آ افسر آتیا ڈوہ بیٹ یا مقدمہ چلیفنگ نا داسکان فیصلہ کننگ تنے‘ حوالی نا رد اٹ واقعہ ءِ پنچ تُو مننگ آن پد ہم کینیا نا حکومت یا آئی پی او اے رپورٹ جاری کتنو‘ کینیا نا حکومت تینا جاست پاست ءِ اِرا تو مست پورو کریسس۔2 پاکستانی افسر عمر شاہد حامد و اطہر وحید تینا رپورٹ اٹ خون ءِ ڈٹ بندی گوندانو‘ پاکستانی افسر آتا رپورٹ اٹ ہمو ادارہ غاتا نشاندہی ہم کننگاسس ہرا خون نا زموار مننگ کریرہ۔ پاکستانی افسر آتا رپورٹ اٹ کینیا ناپولیس آ خون نا ڈوہ ءِ ڈکنگ نا دوبہ ہم خلنگاسس وخت اس کہ کینیا نا انسانی حقوق کمیشن نا ہم ہندا خیال ءِ کہ پولیس ارشد شریف نا خون نا زموار مننگ کیک۔ ایلو کنڈآ اسلام آباد پولیس ارشد شریف نا خون نا دوبہ ءِ اونا مہماندار وقار و خرم احمد آ خلکوسس وخت اس کہ وقار و خرم تینا وکیل نا کمک اٹ خون نا زموار مننگ آن نمن مسوسر۔

(آن لائن)

Get real time updates directly on you device, subscribe now.

Leave A Reply

Your email address will not be published.