ملکی راہشون تا ڈنمارک و نیدر لینڈ اٹی قرآن پاک نا بے شرفی نا مذمت

اسلام آباد: صدر مملکت ڈاکٹر عارف علوی ڈنمارک و نیدر لینڈ اٹی قرآن پاک نا بے شرفی نا واقعہ غاتا ترند انگا لوز آتیٹی مذمت ءِ کرسا پارینے کہ دا عمل دنیا ٹی اسلاموفوبیانا ودوک آ کہول ءِ پاش کیک، جہانی برادری اسلاموفوبیا نا برخلاف عملی گام گیج کے، اورواداری، بین المذاہب ہم آہنگی و مکالمہ ءِ مون آ دننگ کن عملی کوشست آتا گرج آ ہم زور شاغا۔ ایوان صدر نا پریس ونگ انا کنڈآن سے شنبے نادے آ جاری بیان نا رداٹ صدر مملکت آجوئی درشانی سلاہ نا آڑاٹ مسلمان تا جوزہ غاتے مجروح کننگ نا ترندی اٹ مذمت ءِ کرے و پارے کہ آجو سلاہ درشانی خار تس تران و مخلوق ءِ بیدادی آ ہُشکا تننگ نا پن اف، دا عمل آن مچ آ دنیا نا مسلمان تا جوزہ غاک مجروح مسنو۔ صدر مملکت پارے کہ داوڑنا واقعہ غاک اشتعال انگیز و اسلاموفوبیا آ تالان ءِ، توہین نا عمل جہانی کہول آ امنا مروک اصول و آجوئی درشانی سلاہ نا روا درشانی نا اصول آتیان چپ ءِ۔ صدر پارے کہ اسلام انسانیت ءِ امن و ایلمی نا درس ایتک۔ صدر مملکت پارے کہ قرآن پاک نا بے شرفی نا داعمل دنیا ٹی اسلاموفوبیا نا ودوک آ کچ ءِ پاش کیک، جہانی برادری اسلاموفوبیا نا برخلاف عملی گام گیج کے و شدت پسند زموار آتا حوصلہ شکنی ءِ کے۔ داکان بیدس اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی ڈنمارک اٹی ترکیہ نا سفارت خانہ نا مون آقرآن مجید نا بے شرفی نا ترند انگا لوز آتیٹی مذمت ءِ کرسا پارینے کہ قرآن مجید نا بے شرفی آن کروڑ آ مسلمان تااست آزاری مسنے۔ اسلام اسہ پرامن ءُ مذہب اسے ہرا غٹ مذہب آتا منوک آتا شرف ءِ کننگ نا رغامک، اسپیکر و ڈپٹی اسپیکر قومی اسمبلی سے شنبے نادے آ تینا مذمتی بیان تیٹی اوفک پاریر کہ مقدس کتاب قرآن مجید نا بے شرفی آن مسلمان تا جوزہ و احساس آک مجروح مسنو۔ اسلاموفوبیا نا ودوک آ کچ بھاز است ہسونی و مذمت نا قابل ءِ۔ اسلاموفوبیا نا توننگ کن مسلم امہ ءِ اسیجائی موقف اختیار کروئی مریک۔ جہانی برادری قرآن مجید کون آ مقدس کتاب نا بے حرمتی ءِ توننگ کن کڑد ادا کے۔

(اے پی پی)