زلمے خلیل زاد نا بیان تا خارجہ پالیسی تون تعلقداری اف، امریکہ

واشنگٹن : امریکہ مسکوہی امریکی سفیر زلمے خلیل زاد نا عمران خان نا بابت بیان تے اونا جند انا سلاہ گوندسا پارینو کہ زلمے خلیل زاد نا بیان تا امریکی خارجہ پالیسی تون تعلقداری اف۔ ترجمان امریکی محکمہ خارجہ ویدانت پٹیل پارینے کہ مسکوہی امریکی سفیر زلمے خلیل زاد نا عمران خان واونا جماعت نا بابت ٹویٹر کلہوک اونا جند انا سلاہ ءُ۔ زلمے خلیل زاد نا بیانک امریکی انتظامیہ نا نمائندگی ءِ کپسہ او لس شاری اسے‘ اونا بیانک اونا جند انا ءُ‘ زلمے خلیل زاد نابیان تا امریکی خارجہ پالیسی تون تعلقداری اف۔ ویدانت پٹیل پریس بریفنگ نا وخت آپارے کہ سیاست اٹ بیداد‘زیزاریفنگ یا دھڑکو نا ہچ ءُ گنجائشت اس اف‘ پاکستان اٹ کل پڑک آتا کنڈآن کانود نا عملداری نا است بڈی ءِ کینہ‘ او پارے کہ الس ءِ آئینی و جمہوری وڑ اٹ راہشون تے گچین کننگ نابایدے حق رسینگے‘ یات سلے کہ منہ دے مست مسکوہی امریکی سفیر زلمے خلیل زاد تینا ٹوئٹر کلہو تے ٹی عمران خان نا دزگیری و تحریک انصاف آ رکھ انا بابت تینا خیال آتا درشانی کریسس۔

(آن لائن)