گوادر بندرگاہ خولم پروسیسنگ اٹ ایلو ملکی بندرگاہ تیان گو ءِ درے

گوادر: گوادر بندرگاہ خولم نا سرکننگ و پروسسنگ اٹ پاکستان نا ایلو بندرگاہ تیان گوءِ درے‘ گوادر بندرگاہ نا کمک اٹ خولم نا درآمد آن گوادر اٹ واپاری سرجز آک زیات مریرہ،گوادر بندرگاہ نا پی ٹی و قاسم پورٹ کون آ بندرگاہ تیان زیات اقتصادی ءِ‘ گوادر پورٹ اٹ ترندی اٹ سٹیوڈورنگ سروسز تون اوار پین ہچ ءُ ڈیمریج و اسٹوریج چارجز اس اف‘ گوادر بندر گاہ غا خولم اتوک نُہہ جہاز آن داوخت اسکان چار جہاز ہرافتے ٹی ایم وی لیلا چنئی، ایم وی رچ، ایم وی ویروڈا و ایم وی ڈوراڈو اوار ءُ سر مسنو‘ گوادر سی او پی ایچ سی ناکمامدار آک پاریر کہ بھاز آ مشکل آتیان پد ہم گوادر بندرگاہ تدوک آ 25 دے اٹ روس آن اِرا لکھ میٹرک ٹن خولم نا درآمد ءِ ترندی اٹ سر تننگ کن کوشست کننگ اٹی ءِ‘ گوادر پورٹ آ 250000 میٹرک ٹن خولم ارے‘ او پارے کہ گوادر بندرگاہ غا 2 مارچ آن ہراتم اولیکو جہاز لنگر انداز مس تو خولم نا کشنگ وسر کننگ کن صفر ہینڈلنگ نسخان خننگا‘ اوپارے کہ کل لوڈنگ، آف لوڈنگ و ٹرانسپورٹیشن ءِ گچین وڑ اٹ ہینڈل و بست وبند کننگانے‘ ایسٹ بے ایکسپریس وے ہرا خصوصی وڑ اٹ گوادر پورٹ ءِ مکران کوسٹل ہائی وے تون گنڈرہ شار انا سڑک آتے بائی پاس کرسا خولم آن لوڈ ٹرک آتا ہن وبر کن کاریم اٹ بروک اسٹ انگا کر ءِ۔ دابابت گوادر اٹ ساڑی اسہ ٹرانسپورٹر اس پارینے کہ مہالو ٹرک آک گوادر نا رش والا شارانا سڑک آتیان گدرینگارہ ہراکہ نئے بیرہ ہندی شاہراہ غا باریم مسرہ بلکہ ٹرک آتا ہن وبر ہم زہمی مسکہ او مستی پارے کہ ایسٹ بے ایکسپریس تون اوار گوادر پورٹ نا رابطہ سرجز آتیکن کسر ءِ ساف کرینے‘چائنا اوورسیز پورٹس ہولڈنگ کمپنی، ٹریڈنگ کارپوریشن آف پاکستان، پاکستان ایگریکلچرل سٹوریج اینڈ سروسز کارپوریشن لمیٹڈ، پاکستان کسٹمز اینڈ نیشنل لاجسٹک سیل، گوادر فری زون و جی آئی ٹی ایل کل کاریم تیکن ہم آہنگی اٹ کاریم اٹ مننگ اٹی ءِ۔ وزارت نیشنل فوڈ سیکیورٹی اینڈ ریسرچ نا کارندہ اس پارے کہ گوادر پورٹ آن جی ٹو جی بست وبند آتا رد اٹ پک کروک ملین میٹرک ٹن خولم ءِ ہرفنگ کن این ای سی چنکا و جوان انگا کسر اٹ پاسکو اسٹوریج سینٹراسکان خولم تے سر کننگ انگ ءِ‘ دا رد اٹ گوادر انٹرنیشنل ٹرمینلز لمیٹڈ نا عہدیدار اس پارے کہ گوادر پورٹ 200000 میٹرک ٹن سرسہبی اٹ ہینڈل کننگا‘ایلو 250000 میٹرک ٹن خولم نا پروسیسنگ ہندا وڑاٹ مریک‘ او گوادر بندرگاہ نا کمک اٹ خولم نا درآمد ءِ اسہ مزل نا نشان اس گوندسا پارے کہ خولم نا درآمد آن گوادر اٹ واپاری سرجز آک زیات مریرہ‘ اومستی پارے کہ داڑان روزگار نا وارخواہی ہم زیات مریک‘ انتئے کہ ہراتم دا وڑ انا سرجز آک بنا کیرہ تو ہنر مند، نیم ہنر مند و غیر ہنر مند بندغ آتا گرج مریک تاکہ مچ آ کاریم ءِ گچین وڑ اٹ سر تننگ مرے۔

(آن لائن)