حکومت تون ہچ ءُ معاشی پلان اس اف‘ چیف جسٹس

اسلام آباد (آن لائن)سپریم کورٹ اٹ کورونا وائرس ازخود نوٹس کیس نا سماعت نا وخت آ چیف جسٹس آف پاکستان جسٹس گلزار احمد ریمارکس تس کہ حکومت ہچ ءُ کاریم اس کننگ اٹی اف بیرہ بیان بازی کننگ اٹی ءِ، خالی بیان بازی آن اُلس سیر کپک، ملک انا زرگزران دَم تننگ اٹی ءِ، حکومت تون ہچ ءُ معاشی پلان اس اف، جانجوڑی و تعلیم نا بشخ بھاز شیف تمانے، کیہی گریجویٹ آک بےروزگار ءُ ہرافتے روزگار تننگ کن حکومت تون ہچ ءُ پلان اس اف، ہچ مف لکھ انا کچ اٹ لیبر پدی بننگ اٹی ءُ، ہرافتے چانڑدہ دے اکن قرنطینہ کننگ آن پد حکومت تون ہچ ءُ پلان اس اف، حکومت اوفتے امر کیک، حکومت تون اگہ زرگزرانی ڈٹ بندی اس ارے تو مون آ اتے تے، اُلس تون کننگ کن ہچ اس اف،، تنخواہ تننگ کن پیسہ اف چار ارب نا لگژری گاڈی امر خواہفنگ اٹی ءُ، دا گاڈیک صوبہ نا پرمانران تیکن بٹنگ انگانو، اسہ گاڈی نا بہا اسہ کروڑ شانزدہ لکھ روپئی ءِ، دا وڑ نا لگژری گاڈی خواہفنگ نا موکل تفنہ، سندھ حکومت 4 ارب روپئی سپریم کورٹ تون جمع کرفے، نن ہررہ کہ دا چار ارب امر سرکاری ملازم و لیڈر آتا عیاشی تیا خڑچ مریرہ، ملخ نا اسپرے کن جہاز آتا پائلٹ آتے پیشن آن انتئے بٹنگ انگ ءِ؟ دا وخت آ ٹریننگ تننگ نا مطلب ہندن ءِ دہنکہ بینگنی نا وخت آ خولم دسنگ انگ ءِ، نن 44 سال آن جہانی تنظیم نا باسک اسے اُن نمے مالو آن تیار مروئی ئس، حکومت نا رپورٹ ءِ کہ سینٹری ورکر آتے تننگ کن تنخواہ نا پیسہ اف او نی چار ارب روپئی گاڈی تیکن جتا کریس، دا آئین نا فائدہ اینو اسکان عام انگا اُلس ءِ سر متو، چُناک آئین آن فائدہ ہرفنگ نا انتظار اٹ پیر مس، ولے آئین نا میوہ غاتے بیرہ منہ بندغ کُننگ اٹی ءُ، ہرافتیٹی نن ہم اوار اُن، ولے داٹی عام انگا اُلس اوار اف، کراچی نا نالی تے سفا کننگ کن پیسہ اف، او پارینے کہ رپورٹ اٹ پاننگانے کہ جہاز اٹ ہچ ءُ خرابی اس الو، حیرت نا ہیت دادے کہ 15 سال متکن آ جہاز ءِ بال تننگا، رپورٹ اٹ کل سوب ءِ سول ایوی ایشن نا کاٹم آ تخار۔