بلوچستان ہائیکورٹ نا طالبعلم آتا دزگیری نا رپورٹ ءِ پیش کننگ نا پرمان
کو ئٹہ(آن لائن) بلوچستان ہائی کورٹ آن لائن کلاس آتا برخلاف برانز نا وخت آ دزگیر مروک آ طالبعلم آتا بابت انکوائری رپورٹ ءِ زوت اس پورو کرسا عدالت اٹ پیش کننگ نا پرمان کرینے۔ تدوک آ دے بلوچستان ہائی کورٹ نا چیف جسٹس جناب جسٹس جمال خان مندوخیل و جسٹس جناب جسٹس نذیر احمد لانگو استا ڈویژنل بینچ بلوچ اسٹوڈنٹس آرگنائزیشن نا کنڈآن دائر کروک آ آئینی درخواست نا سماعت ءِ کرے۔ درخواست تروک انا کنڈآن میر عطاءاللہ لانگو ایڈووکیٹ ،سپریم کورٹ کورٹ بار ایسوسی ایشن نا مسکوہی صدر کامران مرتضیٰ ایڈووکیٹ ،ساجد ترین ایڈووکیٹ ،حکومت بلوچستان نا کنڈآن ایڈیشنل ایڈووکیٹ جنرل میر شے حق بلوچ پیش مسر، اے اے جی عدالت عالیہ ءِ پارے کہ حکومت نا کنڈآن طالبعلم آتا دزگیری نا بابت ہچ پارت کننگتنے دا واقعہ بیرہ غلط فہمی نا بنداو آ پیش بس۔ ہرانا انکوائری ءِ کننگ انگ ءِ، سماعت نا وخت آ ایڈیشنل انسپکٹرجنرل پولیس عبدالرزاق چیمہ پارینے کہ حکومت نا کنڈآن طالبعلم آتا دزگیری نا نوٹس ءِ ہلنگانے، پولیس نا حراست اٹ ہلوک آ کل ءِ طالبعلم آتے یلہ کننگانے۔ دا وخت آ ہچ ءُ طالبعلم اس پولیس نا حراست اٹ اف، معاملہ نا انکوائری کن ایس ایس پی انویسٹی گیشن نا کماشی ٹی انکوائری کننگ انگ ءِ، وخت اس کہ ایس پی پولیس کوئٹہ سٹی ءِ ہم معطل کننگانے، درخواست گزار نا وکیل میر عطاءاللہ لانگو ایڈووکیٹ عدالت ءِ پارینے کہ حکومت نا کنڈآن دونمبری کننگ انگ ءِ، طالبعلم آتا دزگیری نا پرمان ءِ نئے وزیراعلیٰ مننگ اٹی ءِ او نئے پولیس نا بڑزکو کمامدار آک مننگ اٹی ءُ، وخت اس کہ طالبعلم آتیا کروک آ بیدادی و دزگیری نا بابت آجوئی ٹی جاست و پاست کرفنگے۔ ہراڑا چیف جسٹس جمال خان مندوخیل پارینے کہ آن لائن کلاس آتا برخلاف برانزی طالبعلم آتا دزگیری نا بابت انکوائری مننگ اٹی ءِ او اے آئی جی ءِ پرمان کرے کہ دزگیری تا بابت انکوائری رپورٹ ءِ زوت اس پورو کرسا عدالت اٹ پیش کننگے۔