حکومت ءِ ٹف ٹائم تننگ کن اپوزیشن نا اسہ وار ولدا سربر آتا بنا

اسلام آباد (آن لائن) حکومت ءِ ٹف ٹائم تننگ کن اپوزیشن اسہ وار ولدا لانچا تینے، پیپلزپارٹی و جے یو آئی زوت اس اے پی سی بٹنگ انگ آ سجفنگ نا بنا ءِ کرینو۔حوال نا رداٹ حکومت نا برخلاف تحریک نا حکمت عملی کن پیپلزپارٹی نا سیکرٹری جنرل نیئر بخاری جے یو آئی نا کماش مولانا فضل الرحمن و اکرم درانی تون ٹیلی فون آ حال احوال کرینے، ہڑتوم آ راہشونک ہندا زوتیٹی اسلام آباد اٹ اوڑدہی کننگ آ امنا کرینو، دا اوڑدہی ٹی آل پارٹیز کانفرنس نا اڈ تننگ نا بابت سلاہ کننگک، اوڑدہی ٹی اختر مینگل نا حکومتی سیوت آن جتائی تون اوار ایلو اہم انگا گڑاتیا ہم سجفنگک۔ حوال نا رداٹ پیپلز پارٹی بجٹ و کورونا نا حالیت آ اپوزیشن جماعت آتون رابطہ ءِ ترند کننگ نا فیصلہ ءِ کرینے، پارٹی نا چیئرمین بلاول بھٹو نا پارت آ پیپلز پارٹی راہشونک آل پارٹیز کانفرنس بٹنگ انگ کن اپوزیشن جماعت آتون حال احوال کننگ نا بنا ءِ کرینے۔ پیپلز پارٹی نا کنڈآن شش باسکی اے پی سی کمیٹی اپوزیشن جماعت آتون حال احوال کننگ ءِ بنا کرینے۔ حال احوال کروک آ شش باسکی کمیٹی ٹی نیر بخاری، راجہ پرویز اشرف و شیری رحمان،رضا ربانی، فرحت اللہ بابر و نوید قمر اوار ءُ، پیپلز پارٹی نا راہشون نیر بخاری نا رداٹ کورونا نا بابت اٹ حکومت نا گام گیج آک جوان افس، بجٹ اٹ کورونا نا بابت ہچ ءُ گام گیج اس کننگتنے۔ ساڑی حالیت آتا بابت اٹ سیاسی جماعت آتون حال احوال کننگ اٹی اُن او زوت اس مچ آ ملک انا جماعت آتا اے پی سی اس بٹنگنہ۔