ننے تینا سفارتکار آتے گچین سفارتی تربیت فراوان کروئی تمک،قریشی
اسلام آباد (اے پی پی) وزیر خارجہ شاہ محمود قریشی پارینے کہ ننے تینا سفارتکار آتے کورونانا دین آن پد ترندی اٹ بدل مروک آ دنیا ناخواست آتے مون آ تخسا گچین سفارتی تربیت فراوان کروئی مریک۔ او پنچ شنبے نادے آ اولڈ چائنیز ایمبیسی ٹی واقع فارن سروسز اکیڈمی نا دورہ ءِ کننگ نا وخت آ گپ وتران کریکہ۔ ڈی جی فارن سروس اکیڈمی ندیم ریاض وزیر خارجہ نا ستاءِ کرے۔ وزیر خارجہ داوخت آ پارے کہ ننے تینا آفیسر آتا گچین تربیت کن اوفتے روایتی سفارتکاری تون اوار اوار زرگزرانی سفارتکاری، دودوربیدہ ئی سفارتکاری نا رموز آتیان ہم روشناس کرفوئی مریک دا چرجوئی ٹی سلیبس اٹ بدلی تون اوار غٹ المی گام گیج کننگ انگ ءِ ۔ کوروناوائرس نا دین آن پد ترندی اٹ بدل مروک دنیا نا خواست آتے مون آ تخسا ننے تینا سفارت کار آتے گچین سفارتی تربیت فراوان کروئی مریک تانکہ او عملی زند اٹی، تینا لائخی تے کاریم اٹ اتسا پاکستان نا فائدہ غاتا رکھ ءِ پک کننگ کیر۔ شاہ محمود قریشی پارے کہ فارن سروس اکیڈمی نا زیب و زینت کن پاکستان اٹ چین نا سفیر و چائنا ایمبیسی انتظامیہ نا منت وار اُن۔ ڈی جی فارن سروس اکیڈمی ندیم ریاض و اسپیشل سیکرٹری ایڈمن وزیر خارجہ ءِ اکیڈمی نا چندی بشخ آتا دورہ ءِ کرفے۔ ہراٹی لائبریری، اسٹڈی ایریا، ہنکینی ایریا، ہاسٹل، گوازی تا گرونڈ پین پین اوار ءُ۔