اپوزیشن حکومت ءِ بٹک، نئے بے پتی نا تحریک اتیک، سعد رفیق

اسلام آباد(آن لائن)مسلم لیگ (ن) نا قومی اسمبلی نا باسک خواجہ سعد رفیق پارینے کہ اپوزیشن نہ حکومت ءِ بٹک، نئے بے پتی نا تحریک اتیک، کمبل ءِ نی اِلنگ خواسہ ولے کمبل نے اِلیپک، ہراخس کہ نی وزارت عظمی نا توہین ءِ کریس داسہ وزارت آتے دوٹی ایتس کس اس ہم ہلپک تا، دا وخت زوت اس بریک، ضیاءآمریت پیپلزپارٹی ءِ ایسر کننگ کتو تو کس اس ننا جماعت ءِ ہم ایسر کننگ کپک، اسہ شیخ چلی بس کل ءِ گڑاتے بھس کرے، مننگ کن تیار اُن کہ کشمیر نا ویل ایسر مس، ننے ٹارگٹ کننگا ولے ملک انا بچفنگ نا تو کوشست کر۔ بجٹ تون اوار ہر کاریم ءِ عارضی وڑ اٹ کننگ انگ ءِ، پگہ نے رسید تون اوار حساب ہم تروئی تمک۔ قومی اسمبلی نا دیوان اٹ تینا خیال آتا درشانی ءِ کرسا مسلم لیگ (ن) نا راہشون خواجہ سعد رفیق پارینے کہ اُست خواپک کہ دا ایوان اٹ برین او ہیت کین، مالو ہم پارلیمنٹ نا توہین کننگا ولے داخس اسُل کننگتو۔ پارلیمنٹ نا توہین ہڑتوم آ کُنڈ آتیان مننگ اٹی ءِ، ہراتم پولیس فورس ڈاکٹرک کاریم کریرہ تو پارلیمنٹ نا لاک ڈاون ءِ کننگا، ننا جانک زیات قیمتی ئسر، راستکی دادے کہ پاکستان اٹ جمہوریت اف، کس اس اینو منانے کہ جمہوریت اف کس اس پگہ منک کہ جمہوریت الو، داسہ اسہ وزیر صاحب اس 23 منٹ ذاتی وضاحت آ ہیت کرے، سہب انا کنا اُست خواہتکہ کہ ایوان اٹ بریو او ہیت کیو انتئے کہ اخس کہ پارلیمنٹ نا توہین ءِ عمران خان صاحب نا حکومت نا تاریخ اٹ ہچ ءُ مٹ اس رسینگپک، نن اسہ ایلو نا زی تے اِرّنگ نا مینڈیٹ ہلپنہ بفنہ، اُلس کہنگ اٹی او نم پارلیمنٹ نا لاک ڈاون ءِ کرینے۔ راست انگا ہیت دادے کہ پاکستان اٹ جمہوریت اف، کس اس داسہ منک او کس اس منہ وخت آن پد منک۔ اگہ طاقت دوئی کننگ کن کل جھیڑہ کینہ تو کس اس ہم طاقتور مفک۔ اگہ ہچ اس ہم کتون تو کل نزور مرینہ۔