اپوزیشن سلاہ ایتے، صوبہ کن جوان مسر تو بجٹ اٹ شاغنگرہ، ظہور بلیدی

کوئٹہ (خ ن/ آن لائن) صوبائی وزیر خزانہ ظہوراحمد بلیدی پارینے کہ بجٹ بیرہ پی ایس ڈی پی نا پن اف وخت اس کہ دا صوبہ ٹی بروک آ سال انا گرج آتے مون آ تخسا ڈٹ بندی کننگک۔ اپوزیشن بجٹ ءِ خوانے و داٹی ساڑی کمتی تے نشانی کے اوفتا ہیت آتیا المی سجفنگک۔ دا خیال آتا درشانی ءِ او اسمبلی دیوان اٹ کرے۔ صوبائی وزیر پارینے کہ صوبہ نا کل علاقہ غاتا شونداری ءِ بجٹ اٹ اولیت تننگانے دن مننگ کیک اسہ حلقہ ءِ زیات و ایلو کم بشخ رسینگانے۔ او پارینے بجٹ نا تیاری بیرہ حکومت نا کاریم ءِ او حکومت تاریخی و بجٹ اس پیش کرسا اُلس دوستخواہی نا شاہدی تس۔ صوبائی وزیر پارینے کہ کورونا دَین نا سوب آن صوبائی حکومت آ مالی باریم ارے ہرانا سوب آن سرکاری ملازم آتا تنخواہ تیٹی ودکی کننگتو او پارینے کہ بجٹ خاص کر حکومتی و اپوزیشن نا اُست خواہی نا وڑاٹ جوڑ کننگپک وخت اس کہ بجٹ اٹ کل بشخ آتے اسہ وڑاٹ نمائندگی تننگانے۔ وزیر خزانہ اپوزیشن ءِ دا سلاہ ءِ تسنے کہ مالی سال 2020-21ءنا زی آ ہیت کروک آ دیوان تیٹی بشخ ہلیر تانکہ بجٹ اٹ جتا جتا کاریم تےکن تخوک آ پیسہ غاتا جاچ ءِ ہلنگ کین او صوبہ نا حق اٹ جوان ءُ سفارش پیش کننگے۔ صو بائی وزیر دا پارینے کہ صوبہ نا حق اٹ تروک آ سفارش آتے بجٹ نا بشخ جوڑ کننگک۔ دیوان اٹ پشتونخوا میپ نا نصراللہ زیرے پوائنٹ آف آرڈر آ ہیت کرسا پارینے کہ آن لائن کلاس آتا بنا کننگ آن مست بایدے حکومت طالبعلم آتے ہندا کل ءِ آسراتی تے تسکہ۔ ولے حکومت دا بابت بھاز نزوری نشان تس۔ پرائیویٹ اسکول آک تدوک آ شش تو نا سے بند ءُ، دا وخت اٹ اوفک کیہی وار کمامدار آتون حال احوال کننگ نا کوشست کریر ولے ہچ ءُ ورندی اس رسینگتو۔ او اینو ہم اوفک اسمبلی نا مون آ برانز کننگ اٹی ءُ۔ بی این پی نا پارلیمانی لیڈر ملک نصیر شاہوانی اسمبلی نا مون آ برانز آ تولوک تحریک بحالی بی ایم سی نا برانزی تا بابت ہیت کرے کہ حکومت برانزی تتون اوڑدہی کے او اوفتا ویل آتے ایسر کے۔ بی این پی نا ثناءبلوچ آن لائن کلاس آتا برخلاف برانز کروک آ طالبعلم آتا دزگیری نا مذمت ءِ کرسا پارینے کہ بلوچستان اٹ انٹرنیٹ نا حالیت ننا مون آٹے، صوبہ نا 33 ضلع غاتیٹی 7 ضلع ٹی تھری جی آ پابندی ءِ ہراڑے نیٹ انا آسراتی دوئی ءِ اوڑے بجلی نا آسراتی اف۔ ایلو صوبہ ءِ الے داڑے کوئٹہ ٹی ہم شش آن ہفت گھنٹہ ہڑدے لوڈشیڈنگ مننگ اٹی ءِ۔ حکومت ایچ ای سی تون تولے او دا ویل انا ایسری ءِ کشے وخت اس کہ حکومت طالبعلم آتے 7 آن 8 ہزار روپئی آن لائن پیکیج کن ایتے۔