خواجہ نبی نا پن اتون خاتم النبیین نوشتہ کننگ نا قرارداد آ عمل کرفنہ، اسد قیصر
اسلام آباد (اے پی پی) اسپیکر قومی اسمبلی اسد قیصر پارینے کہ خواجہ نبی اکرم صلی اللہ علیہ و آلہ وسلم نا پن انا بناآ خوانفوک آ کتاب آتے ٹی خاتم النبیین نوشتہ کننگ نا امنائی قرارداد آ عمل کرفنہ، بنجا و صوبہ غاتیان عملدرآمد کرفنگ کن بنجائی و صوبائی حکومت آتے چٹھی ہم نوشتہ کننگک۔ چارشنبے نادے آ قومی اسمبلی ٹی وزیر مملکت پارلیمانی باندات علی محمد خان پارے کہ داایوان 1974ءآن پد ختم نبوت والا فیصلہ غان پد اِرادے مست ہرا قرارداد منظور مس او تاریخی ءُ واقعہ اسے۔ اسمبلی نا منظور کروک قرارداد المی کرینے کہ ہراڑے ہراڑے نصابی کتاب آتے ٹی پن خواجہ محمد صلی اللہ علیہ و آلہ وسلم بریک ہموڑے لوز خاتم النبیین المی لکھنگک و پاننگ و خوانفنگک۔ اسپیکر آفس غٹ بنجائی و صوبائی حکومت و تعلقدار تعلیمی ادارہ غاتے قرارداد آ عمل کن چھٹی نوشتہ کے و قرارداد نا کاپی گدریفے قرارداد آ عمل کرفنگ داایوان نا زمواری ءِ۔ داڑا اسپیکر پارے کہ داننا غٹ اکن بھلو اعزاز نا ہیت اسے کہ خاتم النبیین المی نوشتہ کننگ نا امنائی قرارداد ءِ منظور کرے۔ اسپیکر آفس پک کیک کہ قرارداد آ من و عن عملدرآمد مرے۔ اینو قرارداد ءِ صوبہ و تعلقدار ادارہ غاتے سرمریک۔ فالواپ چیک کننگک کہ اخس عمل مننگ ءِ۔