فواد چوہدری نا راہداری ریمانڈ منظور، میڈیکل کننگ نا پرمان

لاہور: لاہور نا عدالت پاکستان تحریک انصاف نا راہشون فواد چوہدری نا راہداری ریمانڈ ءِ منظور کرسا میڈیکل کرفنگ نا پرمان کرے۔ تدوک آ دے فواد چوہدری ءِ لاہور نا کینٹ کچہری ٹی جوڈیشل مجسٹریٹ رانا مدثر نا عدالت اٹی پیش کننگا، اوڑے پولیس فواد چوہدری ءِ اسلام آباد آ گدریفنگ کن راہداری ریمانڈ نا درخواست کرے، پراسیکیوشن نا کنڈ آن عدالت آن خواست کننگا کہ اسلام آباد نا تھانہ کوہسار نا پولیس فواد چوہدری نا برخلاف مقدمہ درج کرینے، ہندا سوب آن دوبہ دار ءِ اسلام آباد آ گدریفنگ کن راہداری ریمانڈ تننگے۔ فواد چوہدری نا وکیل داڑا اعتراض کرسا پارے کہ اسلام آباد نا 4 گھنٹہ نا کسر اسے، اونگ دننگ کن راہداری ریمانڈ نا گرج مفک۔ دا اسلام آباد آ کار، و اوڑے فواد چوہدری ءِ عدالت اٹ پیش کیر۔ دا اسہ دے نا راہداری ریمانڈ اس ہرفسا اودے پین جاگہ اس دننگ خوارہ۔ فواد چوہدری نا وکیل خواست کرے کہ سفری ریمانڈ جوڑ مفک۔ فواد چوہدری نا ہتھکڑی تے ملنگ نا پرمان کننگے۔ ہڑتوم آ دُو تا جاگہ غا اسہ دُو اٹ ہتھکڑی خلنگے۔ عدالت فواد چوہدری نا وکیل ءِ شندسا پارے کہ نی سٹی ءُ ہیت کرسا وخت ءِ زیان کننگ اُس۔ فواد چوہدری نا وکیل آک خواست کریر کہ اونا ہتھکڑی تے ملنگے۔ اونا حبسِ بے جا نا درخواست ہائی کورٹ اٹی چلینگ انگ ءِ۔ ہائی کورٹ نا فیصلہ بننگ اسکان عدالت راہداری ریمانڈ نا درخواست آ سماعت کپ۔ اخیر اٹ جوڈیشل مجسٹریٹ سماعت ءِ زرہ سے کن ملتوی کننگ آن پد فواد چوہدری نا راہداری ریمانڈ ءِ منظور کرے و عدالت پرمان کرے کہ فواد چوہدری نا میڈیکل ءِ کرفنگے، و اوکان پد اودے اسلام آباد آ راہی کننگے۔ داکان مست اسلام آباد پولیس پاکستان تحریک انصاف نا راہشون چوہدری فواد حسین نا برخلاف الیکشن کمیشن نا درخواست آ تھانہ کوہسار اٹی مقدمہ درج کرے۔ تھانہ کوہسار پولیس نا رداٹ سیکرٹری الیکشن کمیشن درخواست اٹی موقف اختیار کریسس کہ او میڈیا غا خناکہ پی ٹی آئی نا راہشون چوہدری فواد حسین چیف الیکشن کمشنر و باسک آتے اوفتا فرض منصبی آن توننگ کن دھڑکوتس۔ اوآئینی ادارہ غاتا برخلاف شرانگیزی ودی کننگ و مخلوق نا جوزہ غاتے مشتعل کننگ نا کوشست کرینے۔ اسلام آباد پولیس نا ترجمان پارے کہ مقدمہ غا کانود نا رداٹ کارروائی کننگ انگ ءِ۔

(آن لائن // اے پی پی)