خیبرپختونخوا و پنجاب اٹی لس گچین کاری آ 15 ارب روپئی ودکی خڑچ بریک

اسلام آباد :  الیکشن کمیشن خیبرپختونخوا و پنجاب اٹی لس گچین کاری تا اڈتننگ کن 14 ارب 38 کروڑ روپئی نا ودکی ٹیکنیکل ضمنی گرانٹ طلب کرسا ہندا مالی سال اٹی ہڑتوم آ صوبہ و قومی اسمبلی نا 93 حلقہ غاتیٹی ضمنی گچین کاری کن 20 ارب 54 کروڑ روپئی آن زیات نا زر جاری کننگ نا خواست کرے۔ چارشنبے نادے آ بنجائی سیکرٹری خزانہ نا پن نوشتہ کروک آ اسہ چٹھی اسے ٹی سیکرٹری الیکشن کمیشن نا کنڈآن پاننگانے کہ الیکشن کمیشن گچین کاری کانود 2017 نا شق 219 و آئین پاکستان نا رداٹ لس گچین کاری تا اڈتننگ نا پابند ءِ۔ خیبرپختونخوا و پنجاب نا صوبائی اسمبلی تحلیل مسنو وخت اس کہ قومی اسمبلی نا 93 حلقہ خورک ءُ ہراڑے ضمنی گچین کاری تے اڈترفنگ ءِ۔ دا رداٹ وزارت خزانہ 14 ارب 38 کروڑ 80 لکھ روپئی نا ودکی سپلمنٹری ٹیکنیکل گرانٹ مہیا کے وخت اس کہ ہندا مالی سال اٹی 20 ارب 54 کروڑ 40 لکھ روپئی جاری کننگے۔ الیکشن کمیشن وزارت خزانہ ءِ نوشتہ کرے کہ 5 ارب روپئی مہالو آن جاری کننگانے وخت اس کہ 20 ارب 54 کروڑ 40 لکھ روپئی پین دمدستی جاری کننگے۔ لس گچین کاری تا کل خڑچ 47 ارب 41 کروڑ 70 لکھ روپئی آن ودسا 61 ارب 80 کروڑ 50 لکھ روپئی مسنے وخت اس کہ 14 ارب 38 کروڑ 80 لکھ روپئی نا ودکی ضمنی گرانٹ درکار ءِ تانکہ ریسہ غاتیٹی لس گچین کاری تے اڈترفنگ مرے۔ داکان بیدس الیکشن کمیشن پنجاب و خیبرپختونخوا ٹی لس گچین کاری تا اڈتننگ کن پولنگ نا تاریخ نا پڑو نا بابت ہڑتوم آ صوبہ غاتا گورنرآتے چٹھی مون تس، پنجاب اسمبلی نا گچین کاری تا تاریخ 9 آن 13 اپریل وخت اس کہ خیبرپختونخوا اسمبلی نا الیکشن 15 آن 17 اپریل اٹی مقرر کننگے۔ الیکشن کمیشن نا کنڈآن چارشنبے نادے آ گورنر پنجاب نا پرنسپل سیکرٹری نا پن نوشتہ کروک آ چٹھی ٹی پاننگانے کہ آئین نا رداٹ اسمبلی اسے نا تحلیل کننگ آ 90 دے انا تہہ ٹی لس گچین کاری تا اڈتننگ آئینی خواست ءِ۔ پنجاب اسمبلی نا تحلیل 14 جنوری 2023 آ کننگا ہرانا گچین کاری تے 13 اپریل اسکان کرفنگ المی ءِ۔ پنجاب اٹی لس گچین کاری تا اڈتننگ کن پولنگ نا تاریخ 9 اپریل 13 اپریل اسکان مقرر کننگے۔ ہنداوڑ الیکشن کمیشن نا کنڈآن پرنسپل سیکرٹری گورنر خیبرپختونخوا نا پن نوشتہ کروک آ چٹھی ٹی پاننگانے کہ خیبرپختونخوا اسمبلی نا تحلیل 18 جنوری 2023 آ مس ہرانا 90 دے انا 17 اپریل آ پورو مننگ ءِ۔ داکان مست گچین کاری تا اڈتننگ آئینی خواست ءِ۔ ہنداخاطران گورنر خیبرپختونخوا آن خواست ءِ کہ 15 آن 17 اپریل اٹی نا تاریخ صوبہ ٹی لس گچین کاری تیکن مقرر کرفے۔

(اے پی پی)