ہالینڈ اٹ قرآن پاک نا بے حرمتی نا مذمت ءِ کینہ، پاکستان

اسلام آباد: ترجمان دفتر خارجہ پارینے کہ ہالینڈ اٹی قرآن پاک نا بے حرمتی نا پراگندہ غا کاریم نا اخس کہ مذمت کننگے کم ءِ۔ بے شک دا آجو سلاہ درشانی نا پلو ءِ ہلسا اسہ خارتس اسلامو فوبک بد بیسہ ئی تالان کروک ڈوہ اسے۔ دا وڑ انا جارح کارروائی تیان مچ آ دنیا نا یک و نیم بلین مسلمان نا جوزہ غاک لتاڑ مریرہ۔ و داڑان جہان اٹ بے تربڑی و خار ودی مننگ کیک۔ پاکستان مدام دا ہیت ءِ پارسا کرینے کہ آجو سلاہ درشانی نا ہم زمواری اس مریک۔ ترجمان نا کنڈ آن جاری بیان اسے ٹی پاننگانے کہ نن دا ہیت ءِ مننہ کہ دا قومی حکومت و جہانی برادری نا زمواری ءِ کہ اوفک دا وڑ نا پراگندہ کارروائی تے تورر۔ ہرافک مذہبی خار و بیدادی تے وگائفنگ نا مسخت آتے کن کننگرہ۔ جہانی برادری اسلام فوبیا نا برخلاف جم توار چست کے، مذہبی ہم آہنگی ءِ شون تننگ کن کاریم کننگے،اقوام متحدہ نا جنرل اسمبلی 2022ء اٹی 15 مارچ نا دے ءِ اسلامو فوبیا نا مون ءِ توننگ کن جہانی وڑ اڈ تننگ کن منظور کرے، قرار داد نا پد اٹ ہندا سوب آک ئسرہ۔ پاکستان نا گڑتیک ہالینڈ نا کمامدار آتسکان سر کننگ انگ ءُ۔ نن اوفتیان خواست کینہ کہ اوفک پاکستانی الس و مچ آ دنیا نا مسلمان تا جوزہ غاتا خیال ءِ تخر۔ و دا وڑ انا خارتس و اسلام فوبک کارروائی تے توننگ کن گام گیج کیر۔

(آن لائن)