دہشت گردی تون اواری اٹ مون تسن‘ عمران خان ملک ءِ تنکی تا گواچی کرے‘بلاول

اسلام آباد : پاکستان پیپلز پارٹی نا چیئرمین و وزیر خارجہ بلاول بھٹو زرداری پارینے کہ میثاق جمہوریت اٹ اسحاق ڈار نا اہم ءُ کڑدار اسے‘ ڈار صاحب نا بھاز احترام ءِ کیوہ او کنا بھلا ءِ۔ آصف علی زرداری یار تا یار ءِ‘ دا دنگ اٹ مرسا کنے تینا زمواری تے ہم پورو کروئی ءِ‘ شہبازشریف مسلم لیگ ن آن زیات پیپلزپارٹی نا زیراعظم ءِ‘ ای شہبازشریف آن جوان ءُ پین وزیراعظم خنتنٹ‘ وزیراعظم نا دوتے سوگو کننگے‘ ننے الس ءِ حساب تننگ مشکل مریک۔ وزیراعظم نوکاپ نا کل زہمی تا علاقہ غاتا دورہ ءِ کرے۔ دا خیال آتا درشانی ءِ او جمعہ نادے قومی اسمبلی نا دیوان اٹ تینا خیال آتا درشانی ءِ کرسا کرے۔ وزیر خارجہ بلاول بھٹو زرداری پارے کہ اسحاق ڈار نا منتوار اٹ کہ نوکاپ نازہمی تیکن فنڈ انا باوری کرفے۔ وزیراعظم شہباز شریف نامنتوار اٹ کہ او قول تے پورو کرے۔پاکستان اٹ ورناتیکن ہیت کننگ سخت ءِ‘ ننے بھلا تے شرف تننگ ءِ ہیل تننگانے‘ کنے بے نظیر بھٹو ہندا ہیل تسنے کہ بھلاتے شرف تننگے‘ ننا سیاست اٹ کرینگ و زا وبد اف‘ گچین وڑ اٹ سیاست کننگے تاکہ ملکی ویل آتے ایسر کننگ مرے۔ ویل آتا سہی وڑ اٹ نشاندہی کننگ ہم المی ءِ‘ اوپارے کہ یواین سیکرٹری جنرل تون اوار مچ آ دنیا ءِ نوکاپ نابابت متحرک کرین‘ ہندا خواری نا بھرم اٹ جنیوا ٹی کانفرنس اٹ 9ارب ڈالر فنڈ انا باور کرفنگاسس‘ دا سرسہبی آ وزیراعظم اسیجا پریس کانفرنس کرے۔ نوکاپ نا زہمی تا بحالی و نوکاپ آن بچنگ کن ننے کاریم نا بناءِ کروئی ءِ‘ داڑکن انفرسٹکچر اٹ بدلی اتوئی مریک۔ ننے دا وڑ انا ڈٹ آتیکن فنڈ تروئی مریک‘ اگہ نن تیناقول تے است آن درین تو وزیراعظم تون اوار کس آ پت مفک۔ ڈار صاحب فنڈ تخسا ننا پت ءِ بحال کرینے‘ آخبت نا ڈٹ آتا ہم 15جولائی اسکان پڑو کننگک‘ او پارے کہ پاکستان ءِ گرین انقلاب کن تیار مروئی مریک تاکہ موسمی بدلی آن بچنگ کین۔ کریڈیبلٹی بھاز المی ءِ دا ہمو وخت آ دوئی مریک ہراتم الس تون راست پانہ‘ اگہ دا وڑ کپنہ تو الس نا پت چٹک۔ مسکوہی وزیراعظم عمران خان دروغ تڑیکہ ہندا سوب آن ملک انا تہٹی ہم ننے نسخان مس و جہانی کہول آ ہم نسخانی مسُن۔

(اے پی پی)