سی پیک پاکستان نا راجی و زرگزرانی شونداری ٹی کمک کیک‘شہبازشریف

پیرس: وزیراعظم شہباز شریف و چین نا وزیراعظم لی کی چیانگ نا نیام اٹ جمعہ نادے آ پوسکن آ جہانی مالیاتی معاہدہ نا بابت سروک دیوان نا وخت آ اوڑدہی مسنے۔ اوڑدہی ٹی ہڑتوم آ کنڈآتا تعلقداری، چین پاکستان اقتصادی راہداری تون اوار زرگزرانی کمکاری نا مون آ دننگ، بڑزکوکہولی رابطہ غاتے برقرار تخنگ و اسیجائی فائدہ غاتا دوئی کننگ کن اواری ات کاریم ءِ برجاتخنگ آ پکا عزم انا درشانی ءِ کرینو۔ یات سلے کہ برجاسال مارچ اٹی وزارت عظمیٰ نا زمواری ءِ سنبھالنگ آن پد وزیراعظم لی کی چیانگ نا وزیراعظم شہباز شریف تون دا اولیکو اوڑدہی ئسک۔ اوڑدہی پاکستان و چین نا سدا بہار آزموندہ کوآپریٹیو شریداری نا روایتی خیرخواہی و پرجوش چاگڑد اٹی مس۔ اوڑدہی ٹی ہڑتوم آ سرکڑدہ غاک پاکستان چین اقتصادی راہداری(سی پیک) تون اوار ہڑتوم آ کنڈآتا تعلقداری نا غٹ پلو و ہڑتوم آ کنڈآتا زرگزرانی کمکاری آ سرجمی اٹ گپ و تران کریر۔ اہم سرحال آتیا چین نا مخ تفی نا درشانی ءِ کرسا وزیراعظم شہباز شریف پاکستان نا جغرافیائی سالمیت، وتواجہی و راجی و زرگزرانی شونداری کن چین نا پکا و پدریسہ مخ تفی نا منت واری ءِ ہرفسا پارے کہ جموں وکشمیر نا جھیڑہ ئی ڈیہہ اٹی جی 20 نا دیوان بٹنگ نا چین نا کنڈآن پبی مخالفت اقوام متحدہ نا قرارداد و جہانی کانود نا بالادستی نا چین نا اصولی موقف نا درشانی ءِ۔ وزیراعظم لی کی چیانگ پارے کہ پاکستان و چین نا سنگتی یکتا و ہڑتوم آ ملک آتا الس نا نیام اٹ ساڑی ایلمی جوزہ غاتیااستوار ءِ ہراوخت و حالیت آتا بدلی آن بے نیاز ءِ۔ چین نا وزیراعظم پارے کہ چین پاکستان نا اہم فائدہ غاتا رکھ، زرگزرانی شونداری وپاکستان نا الس نا شونہالی کن تینا کوشست آتے برجاتخک۔ پاکستان اٹ سی پیک ڈٹ آتا سوگو وڑاٹ شونداری نا عمل آ است جمی نا درشانی ءِ کرسا ہڑتوم آک دا ہیت آ امنا کریر کہ سی پیک پاکستان نا راجی و زرگزرانی شونداری ٹی مرکزی اہمیت تخک۔ ہڑتوم آ ملک آتا اسیجائی فائدہ غاتا دوئی کننگ کن اواری اٹ کاریم ءِ برجاتخنگ نا پکا عزم انا درشانی ءِ کننگا۔ ہڑتوم آ سرکڑدہ غاک برجاسال سی پیک نا سرسہبی نا دہ سال پورو مننگ نا خوشی ءِ پبی وڑاٹ اڈتننگ آ امنا کریر۔ وزیراعظم شہباز شریف و وزیراعظم لی کی چیانگ پاکستان و چین نا نیام اٹ بڑزکو کہول انا رابطہ غاتا رفتار ءِ برقرار تخنگ آ ہم امنا کریر۔ وزیراعظم شہباز شریف چین نا تینا ہم منصب ءِ زوت پاکستان نا دورہ ءِ کننگ نا سلہ خلک ہرا دے وزیراعظم لی کی چیانگ امنا کرے۔ وزیراعظم محمد شہباز شریف پارینے کہ جہانی برادری شرم الشیخ اٹی کوپ-27 اٹی کروک آ قول آتے پورو کے، قدرتی آفت آتیان سپلائی چین اٹی اڑاند مننگ آن اجناس نا نہاد و کبینی ٹی ودکی مس، زرگزرانی نمو سلیس، دنیا ساڑی آ زرگزرانی و موسمیاتی انتشار ءِ اصلاح نا موقع نا وڑاٹ کاریم اٹ اتنگے۔ جمعہ نادے آ تینا ٹویٹ اٹی وزیراعظم پارے کہ اسہ پوسکن ءُ جہانی مالیاتی معاہدہ اسے کن سروکی دیوان نا وخت آ ای تینا گپ وتران اٹی جہانی راہشون تا چکار ءِ ہمو خارجی عوامل آتا کنڈآ کرفے ہراڑان پاکستان کون آ پدتموک ملک آتیکن تنکی ودی مس۔ داعوامل آتا سوب آن شونداری سلیس، سپلائی چین اٹی خلل تمنگ آن اجناس نا نہاد و کبینی ٹی ودکی مس، ولدا ترند موسمی واقعہ غاتیان بدترین نوکاپ بس ہراڑان پاکستان ءِ 30 ارب ڈالر نانسخان مس۔ اوپارے کہ جہانی برادری شرم الشیخ اٹ کوپ۔27اٹی کروک آ قول آتے پورو کے۔ ہراٹی مساویانہ مالیاتی اصول آ لاس اینڈ ڈیمیج فنڈ ءِ فعال کننگ، ہمو گرانٹ آتا فراوانی ہرا پدتموک ملک آتا بھلا وام تیٹی ودکی کپس و چاگڑدی بدلی تا منفی اثرآتا خطرہ غان دوچار ملک آتے چاگڑدی خطرہ نا انڈیکس نا بنداو آ فنڈ اسکان رسینگ نا قابل جوڑ کننگ اوار ءِ۔ پائیدار شونداری ہدف(ایس ڈی جیز) نا دوئی کننگ کن مالیاتی پرخ ءِ پورو کننگ اٹ بے سہبی تون اوار اوار موسمیاتی ہدف آتے دوئی کننگ کن دنیا ءِ بھلو نہاد اس تروئی تمنگ ءِ، ہرا کہ سالانہ کھرب آ ڈالر ءُ۔ اوپارے کہ دنیا ساڑی زرگزرانی و موسمیاتی اانتشار ءِ اصلاح نا موقع نا وڑاٹ کاریم اٹ اتنگے۔ جہانی مالیاتی پنر آ دُوارہ سجفنگ اونا نقطہ بنا مننگ کیک ہراڑے آئی ایف آئیز تینا پروگرام تے شونداری نا مخ تف و ایس ڈی جیز وموسمیاتی انصاف نا ہدف آتون منسلک کننگ کن ڈیزین کننگ کیرہ۔ اوپارے کہ دنیا داوخت آ حقیقت آن آگاہی نا لمحہ غاتا مون تروک ءِ، ببو نن غٹ یکجہتی و ہمدردی نا جوزہ اٹ چیلنج نا مقابلہ ءِ کننگ نا قول کین۔

(اے پی پی)