7باسکی بینچ انا پد ہم 14مئی گچین کاری نافیصلہ نا وڑ مریک‘رانا ثناء اللہ

اسلام آباد: بنجائی وزیرداخلہ رانا ثناء اللہ پارینے کہ پندار چیف جسٹس پارے کہ دا بینچ غیرکانودی ءِ ولے بینچ ولدا ہم ضد آ سلوک ءِ و فیصلہ کننگ کن سنبرینگوک ءِ‘ سینئر انگا جج بینچ ءِ غیرآئینی و غیرکانودی گوندانے‘ خلیس ارے کہ دا بینچ انا فیصلہ ہم 14 مئی نا گچین کاری نا فیصلہ نا وڑ گواچی مریک۔ قومی اسمبلی نا دیوان اٹ تینا خیال آتا درشانی ءِ کرسا رانا ثناء اللہ پارے کہ دَرو بینچ اٹ اوار سینئرانگا جج پارے کہ ای دا عدالت ءِ منپرہ‘ اگہ ای ہیت کیوہ تو کنے آ توہین عدالت لگک‘ پٹیشن دائر کننگ آن مست اِرا سینئر وکیل چیئرمین پی ٹی آئی تون اوڑدہی کریر و چیئرمین پی ٹی آئی آن پد ہندافک چیف جسٹس پاکستان تون اوڑدہی کریر‘ اوپارے کہ جسٹس قاضی فائزعیسٰی آئینی موقف تینائی کرے تو 2 سینئر وکیل اودے منت کریر کہ او بینچ ءِ الپ‘ ہمو ہڑتوم آ سینئر وکیل آک عمر انا ہمو بخش اٹی ءُ ہرافتا جونی و دماغی حالیت جوان اف‘ کنے ہندن لگک کہ دا ہڑتوم آ وکیل آک تینا اننگ ءِ گوازی کرینو داسہ تینا جنازہ ءِ خراب کننگ اٹی ءُ۔ وزیرداخلہ پارے کہ عدلیہ نافیصلہ ناواکداری کنڈہلپننگ‘ شفافیت و انصاف اٹی ءِ‘ پنجاب اٹ گچین کاری تا فیصلہ غا عمل مننگ کتو و داسہ او تاریخ نابشخ اسے‘ دا ہیت ہم تاریخ نابشخ اسے کہ بار کونسلز و ایسوسی ایشنک فل بینچ انا خواست کریر‘ دا پارلیمنٹ ہم فل بینچ انا ہیت کرے ولے اودے امنا کننگتو۔کل دو تفیر چیف جسٹس ءِ پاریر کہ گچین کاری باندات آ لارجربینچ جوڑ کننگے ولے چیف جسٹس لارجربینچ نا جاگہ غا 3 باسکی بینچ انا فیصلہ ءِ بنفے‘ ولدا ہمو فیصلہ غا انت مس کل خنار تے۔ رانا ثناء اللہ مستی پارے کہ 14 مئی آ پنجاب اٹ گچین کاری کرفنگ نا فیصلہ مس ولے 14 مئی آ پنجاب نا گچین کاری تیان عمل مننگ کتو‘ بایدے سپریم کورٹ نافیصلہ غاتیا عمل کننگے ولے منشا نا بینچ جوڑ کرسا منشا نا فیصلہ کرفنگک تو اوفتے ٹی طاقت مفک‘ عدالیہ نا فیصلہ غاتا طاقت شفافیت اٹی ءِ۔ او پارے کہ کانود نا رد اٹ چیف جسٹس بینچ جوڑ کرے تو کس اس جج اسے مائنس کننگ کپک‘ دَرو دمدستی جج آتے مائنس کرسا پوسکن ءُ بینچ اس جوڑ کننگا‘ داخس اشتاف انتئے‘ ہیت انت ءِ قوم پُہہ مننگ اٹی ءِ‘ رانا ثناء اللہ پارے کہ ننا تنکی تیان پیش تمپننگ نا اسہ سوب اس عدالت و جج آتا انصاف کپننگ ءِ۔ عدالت یا جج آک ان لاز نا گواچی ءُ‘ یا او سیاست کننگ اٹی ءُ‘ جاگہ اس مدر ان لا نا باندات ءِ تو جاگہ اس سن ان لا ناءِ‘ ہرا بینچ فیصلہ کننگ کن سنبرینگوک ءِ اونا پندار چیف جسٹس پارے کہ دا عدالت اس اف۔ پندار چیف جسٹس پارے کہ دا بینچ غیرکانودی ءِ ولے بینچ ولدا ہم ضد کننگ اٹی ءِ و فیصلہ کننگ کن سنبرینگوک ءِ۔ خلیس ارے کہ دا وڑ انا بینچ انا فیصلہ ہم 14 مئی نا گچین کاری نا فیصلہ نا وڑ گواچی مریک۔ او پارے کہ اگہ آرمی ایکٹ 1952 انا رد اٹ ٹرائل مننگ کپک تو گڑا اودے کالعدم گوندنگے‘ ہر کس آرمی ملکیت آتیا جلہو کیک تو اونا ٹرائل ٹریفک لا آخا آرمی ایکٹ انا رد اٹ مریک‘ آرمی ایکٹ انا رد اٹ ٹرائل ملٹری کورٹ انا کمک اٹ مریک۔ گڑا ہمو بندغ آتا ہیومن رائٹس ارے ہرافک شہید آتا بے حرمتی ءِ کریر؟ لیفٹیننٹ ارسلان شہید نا لمہ ایڑھ تا ہیومن رائٹس اف؟ میجر اسحاق نا اُرائی و 6 تُو انا مسڑ نا ہچ ءُ ہیومن رائٹس اس اف؟ گڑا بیرہ ہمو بندغ آتے حق ارے ہرافک ڈٹ بندی کیر۔

(اے پی پی)