کوریا و سری لنکا تون اقتصادی، واپاری و کمکاری ءِ ودفنگ ناگرج ءِ‘صدر عارف علوی

اسلام آباد: صدر مملکت ڈاکٹر عارف علوی کوریا و سری لنکا تون اقتصادی، واپاری و دودوربیدگی کمکاری ءِ ودفنگ نا گرج آ زور شاغساپارینے کہ پاکستان چندی بشخ آتیٹی کوریانا زرکاری نا ستاءِ کیک۔ آجو واپاری معاہدہ نا رداٹ سری لنکا تون اقتصادی و واپاری تعلقداری تے پین ودفنگ خوانہ۔ ایوان صدر نا پریس ونگ آن جمعہ نادے آ جاری بیان نا رداٹ صدر مملکت داخیال آتا درشانی ءِ سویلی کوریا و سری لنکا نا سفیر آتون سپاروکی اوڑدہی ٹی کرے۔ صدر مملکت جمہوریہ کوریا نا دزکش مروک آ سفیر سوہ سنگ پیو تون گپ وتران کرسا پارے کہ پاکستان کوریا تون تینا کثیر الجہتی تعلقداری ءِ بھاز اہمیت ایتک، پاکستان وکوریا سیاسی، اقتصادی، سائنسی، دودوربیدگی و السی رابطہ غاتا بشخ اٹی کمک کننگ ءِ۔ اوپارے کہ پاکستان کاروبار و زرکاری کن غٹ شریدار آتے بخیر اٹ پاہک، پاکستان چندی بشخ آتیٹی کوریانا زرکاری نا ستاءِ کیک، پاکستان کوریا تون انفارمیشن ٹیکنالوجی و کشت وکشار نا بشخ آتیٹی کمکاری ءِ ودفنگ خواہک۔ صدر مملکت کورویا تون دودوربیدگی کمکاری ءِ پین مون آ دننگ آہم زورشاغا و پارے ک پاکستان کوہ پیمائی و مذہبی سیل و سواتی ہند آتا حامل ءِ۔ ڈاکٹر عارف علوی پارے کہ پاکستان کوریا نا سیل و سواتی تے بدھ مت نا ہندآتا سیر ءِ کننگ کن بخیر اٹ پاہک، گندھارا تہذیب و بدھ مت نا مقدس ہند آک کورین سیل و سواتی تیکن کشش نا سوب جوڑ مننگ کیرہ۔ صدر مملکت سری لنکا نا دز کش مروک آہائی کمشنر، موہن وجیو کرماتون گپ وتران کرسا پارے کہ سری لنکا سویلی ایشاٹی پاکستان نا ارٹ میکو بھلا واپاری شریدار ءِ، آجو واپاری معاہدہ نا رداٹ سری لنکاتون اقتصادی و واپاری تعلقداری تے پین ودفنگ خوانہ، ہڑتوم آ ملک آک سارک انا بحالی کن کسر پٹر۔ صدر پارے کہ ہڑتوم آ ملک آک سویلی ایشیا ٹی نیزگاری نا چٹفنگ، امن و شونداری کن بایدے اواری اٹ کاریم کیر۔ صدر ڈاکٹر عارف علوی پاکستان تون تین پہ تینی است خواہی نا غٹ بشخ آتیٹی ہڑتوم آکنڈآتا کمکاری ءِ گچین کننگ اٹ دزکش مروک آ سفیر آتا کڑد انا ستاءِ کرے۔

(اے پی پی)