سی پیک‘گوادر پورٹ و دیکی روٹ آن بلوچستان شون ہلیک‘مریم نواز

اسلام آباد : پاکستان مسلم لیگ (ن) نا نائب صدر و چیف آرگنائزر مریم نواز پارینے کہ نوازشریف و وزیراعظم شہبازشریف مدام بلوچستان ناشونداری کن کاریم کرینو‘ بلوچستان نا شونداری پاکستان نا شونداری نابنداو ءِ‘ سی پیک، گوادر پورٹ، دے کی روٹ اتون اوار ایلو ڈٹ آک بلوچستان نا شونداری نا ذریعہ جوڑ مریرہ‘ بلوچستان نا ورناتا شونداری ءِ اولیت ایتنہ۔ دا خیال آتا درشانی ءِ او نیشنل پارٹی نا ڈل اتون ہیت وگپ کرسا کرے۔ مسکوہی وزیراعلی بلوچستان و صدر نیشنل پارٹی ڈاکٹر عبدالمالک بلوچ ناکماشی ٹی ڈل تدوک آ دے اوڑتون اوڑدہی کرے۔ نیشنل پارٹی نا نائب صدر ومسکوہی سینیٹر میر کبیر احمد، سیکریٹری جنرل جان بلیدی سینیٹرطاہر بزنجو ہم اوڑدہی نا وخت آساڑی ئس وخت اس کہ سینیٹر اکرم بلوچ‘ ایوب ملک و نیشنل پارٹی پنجاب نا صدر اسلم بلوچ ہم ڈل اٹ اوار ئس۔ مریم نوازشریف نیشنل پارٹی نا ڈل ءِ بخیر کرے‘ اوڑدہی ناوخت آ ملک انا جم سیاسی حالیت آتیا گپ وتران کننگا‘ دا وخت آ مریم نواز پارے کہ بلوچستان و اونا الس ءِ اولیت ایتنہ۔ وزیراعظم یوتھ پروگرام نا رد اٹ بلوچستان نا ورناتے مونی ہننگ نا وارخواہی ایتنہ۔ تعلیم، کشت وکشار‘ صنعت، آئی ٹی ٹی پوسکن ءُ کاروبار و روزگار ایتنہ‘ گوازی تے ٹی شونداری نا وارخواہی فراوان کینہ۔ ڈاکٹر عبدالمالک بلوچ مریم نواشریف نا سیاسی جہد ءِ خراج تحسین پیش کرے‘ او پارے کہ نوازشریف سیاسی اکاموڈیشن نا مدام است بھلنی نشان تسنے۔ حوالی نا رد اٹ اوڑدہی ٹی پاکستان مسلم لیگ (ن) و نیشنل پارٹی ٹی سیاسی کمک ءِ ودفنگ آ ہم گپ وتران کننگا۔

(آن لائن)