لوکل و ڈومیسائل نا ویل ءِ کانود نا کمک اٹ چٹفنہ‘ ربابہ خان بلیدی

کوئٹہ :  پارلیمانی سیکرٹری کانود و پارلیمانی امور سائنس اینڈ انفارمیشن ٹیکنالوجی ڈاکٹر ربابہ خان بلیدی تون تدوک آ دے سیکرٹری کانود و پارلیمانی امور عبدالصبور کاکڑ اوڑدہی کرے و محکمہ جاتی امور تون اوار لوکل و ڈومیسائل سرٹیفکیٹ نا بابت اسٹیک ہولڈر نا میٹنگ نا بابت ہیت وگپ کریر۔ ڈاکٹر ربابہ خان بلیدی پارینے کہ لوکل و ڈومیسائل کاغد آتا بابت پوسکن آ کانود و ضوابط نا تشکیل آن مست کل اسٹیک ہولڈر و سیاسی جماعت نا بااختیار راہشون تا سلاہ نا فیصلہ وزیر اعلیٰ بلوچستان نا کماشی ٹی دیوان اٹ کیک۔ محکمہ کانود اٹ اڈ ہلوک ارا دیوان تا سفارش آتے پک وڑ اٹ تننگ اٹی ءِ۔ ہرا ہندا ہفتہ وزیر اعلیٰ بلوچستان آ سر کننگک۔ ڈاکٹر ربابہ خان بلیدی پارینے کہ صوبائی دارالحکومت کوئٹہ و بلوچستان نا بارڈر ایریا نا ضلع غاتا ڈغاری حالیت بھاز جتا ءِ۔ ہندا سوب آن کل راستیکی تے مون آ تخسا داوڑ جوان کانود سازی و ضوابط تشکیل تننگک۔ ہراڑان ہر وڑ نا ہیت آک ودی مریرہ و ہر وڑ نا تپہ غاتا حق تلفی مف۔ سیکرٹری حکومت بلوچستان کانود و پارلیمانی امور عبدالصبور کاکڑ پارینے کہ ساڑی دور انا رداٹ بلوچستان ا اُلس ءِ لوکل، ڈومیسائل، ڈرائیونگ لائسنس و اسلحہ لائسنس تون اوار المی کاغد آتے کمپیوٹرائزڈ کرسا سنگل کارڈ پنی کرفنگا۔

(خ ن)