نوشکے‘پیرا میڈیکل اسٹاف نا خواست آتے دمدستی پورو کننگے ‘شوکت شاہ بلوچ
نوشکے (تلارحوالکار) پیرا میڈیکل اسٹاف ایسوسی ایشن نوشکے ناکنڈآن خواست آتا حق اٹ DHQ سول ہسپتال نوشکے ٹی برانزی مچی اڈ تننگا‘ دا وخت آ پیرا میڈیکل اسٹاف نوشکے نا صدر شوکت شاہ بلوچ، جنرل سیکرٹری کریم خان مینگل، چیئرمین عابد شاہ، میر افضل خان بادینی، منظوراحمد، صفدر حسین شاہ، محمد ہاشم مینگل، ڈاکٹر زبرین، صادق صبائ، نعمت اللہ مینگل وایلوفک تران کرسا پاریر کہ ننا خواست آتے ٹی پوسٹ اپ گریڈیشن، شہداءپیکج، معطل اسٹاف سول ہسپتال کوئٹہ نا بحالی، تجدید سروس اسٹریکچر، بنیادی تنخواہ نا بریبر رسک الاﺅنس اوار ءِ ۔ او پاریر کہ پیرا میڈیکل اسٹاف فرنٹ لائن آ کاریم کننگ اٹی ءِ اوفتے رکھی ازباب فراوان کننگے‘ کورونا نا دا دین آن بھاز آ پیرامیڈیکل اسٹاف زہمی مسنے‘ اوفتے بنداوی آسراتی تننگے۔ او پاریر کہ پیرا میڈیکل اسٹاف نا کارندہ غاتے بونس تنخواہ اس تننگے، بلوچستان اٹ پیرا میڈیکل اسٹاف نا خواست آتے دمدستی پورو کننگے و اوفتے رکھی کٹ فراوان کننگے۔