میرعارف جان محمدحسنی نا شونداری کاریمک ستا کڑزہ‘امیربخش سمالانی

نوشکے(تلار حوالکار) سیاسی وقبائلی راہشون میر امیر بخش سمالانی پارینے کہ الس ناخواست آ صوبائی وزیر میر عارف جان محمدحسنی چاگئے علاقہ ٹی شونداری کاریم کرسا الس ءِ خوش کننگانے ہراکہ ستا کڑزک‘ او پارے کہ صوبائی وزیر میر عارف جان محمدحسنی زاروچاہ غان چاغی روڈ تون اوار ایلو سڑک آتا تعمیرتون اوار شونداری کاریم بنا کرسا گام گیج کرینے‘ اوپارے کہ تدوک آ سال نن میڈیا نا کمک اٹ توار چست کرین کہ سب تحصیل چاغی ٹی بھاز ہندن ءُ علاقہ ءُ ہرا آبنوشی، اسکول، روڈ و بی ایچ یو نا آسراتی تیان محروم ءِ‘ ننا خواست ءِ کہ صوبائی وزیر میر عارف جان محمدحسنی بایدے پسماندہ علاقہ سب تحصیل چاغی نا کلی تا بنداوی ویل آتے ایسر کننگ کن تینا کڑد ادا کے تاکہ علاقہ شونداری نا کسر آ روان مننگ کے۔او پارے کہ نن علاقہ ٹی مثبت شونداری کاریم تا خیرمقدم و است بڈی ءِ کینہ۔