9مئی واقعہ، پی ٹی آئی آ رکھ انا بابت ہم سجفنگ انگ ءِ، خواجہ آصف

اسلام آباد : وزیردفاع خواجہ محمد آصف پارینے کہ 9 مئی نا واقعہ غاتا پاکستان نا 75 سالہ تاریخ اٹی درور ملیپک ہراتم شہید آتا بے شرفی ءِ کننگا، فوجی تنصیب آتیا جلہو کننگا اوفتا پد اٹ ڈٹ بندی و گندہ انگا مسخت آک ئسر، پرتشدد واقعہ و فوجی تنصیب آتیا جلہو آتیا پاکستان تحریک انصاف آ پابندی تا جاچ ءِ ہلنگ اُن، عمران خان فوج ءِ تینا حریف تصور کرینے، دزگیر دوبہ دارآک پاننگ ءُ کہ دا ڈٹ آتا مہالو آن ڈٹ بندی ئس، عمران خان نا کروک آ گام گیج آتیان بھارت اٹی خوشی کننگا۔ چارشنبے نادے آ اسلام آباد اٹی میڈیا تون گپ وتران کرسا اوپارے کہ 98 مئی نا وعاقعہ غاتا ہرا شاہدی مون آ بسنے اوڑان پیدوار مریک کہ دا غٹ ءِ اسہ ڈٹ بندی اسے نا رداٹ کننگا، اونا تینا مخلوق دادے پک کننگ ءُ کہ دانا ڈٹ بندی اسہ سال آن مسکہ و بھاز انگا شاہدی مون آ بس و اونا تینابندغ آک اعتراف کریر کہ عمران خان کیہی وار بریف کرے کہ اگہ اودے دزگیر کننگک تو ولدا ردعمل اٹ داغٹ ءِ کروئی ءِ، دا اونا آخیریکو چم ئس، داوڑنا عزم ہندوستان نا تو مننگ کیک پاکستانی اسے نا آخا، عمران خان نا دا گام گیج آتیا بھارت اٹی جشن کننگا و داپاننگاکہ دا ننا فائدہ غاتے مون آ دننگ نا کوشست اسے، مستین اٹ مسلم لیگ (ن) و پیپلزپارٹی نا ہم اختلاف ئس ولے وخت اس ہم داوڑنا انتہاپسندی یا فوج ءِ شست کننگتنے۔ عمران خان تینا اقتدار نا جنگ اٹی فوجءِ فریق کننگ ءِ۔ اوپارے کہ 9 مئی آ گندہ انگا مسخت آتا رداٹ کور کمانڈر نا اُراغا جلہو کننگا، پشاور اٹی ریڈیو پاکستان نا ماڑی ءِ خاخر تننگا، شہید آتا یات گار و فوجی تنصیب آتے شست کننگا، دا غٹ ءِ ڈٹ بندی اٹ کننگا۔ داکان بیدس وزیردفاع خواجہ محمد آصف تون آذربائیجان نا اول نائب وزیر دفاع و چیف آف جنرل اسٹاف کرنل جنرل کریم والویو اوڑدہی کرے ہراٹی دفاعی کمکاری تون اوار غٹ بشخ آتیٹی آذربائیجان تون شریداری آ گپ وتران کننگا۔ وزیر دفاع پارے کہ ہڑتوم آ ملک آک اسیجائی مذہب، دودوربیدگ و تاریخ اس تخرہ، ہڑتوم آ ملک آک چندی جہانی فورم تیا اسہ ایلو نا مخ تفی ءِ برجاتخرہ۔ شرفمند آ مہمان پارے کہ آذربائیجان پاکستان تون اواری اٹ کاریم کننگ نا خواہندار ءِ۔ آذربائیجان پاکستان ءِ دفاع تون اوار چندی بشخ آتیٹی پبی آزموندہ نا سوب آن اہم تکک۔ ہڑتوم آک علاقائی و جہانی امن و شونہالی نا دوئی کننگ کن دفاع نا بشخ اٹی بڑزکو کہولی ہڑتوم آ کنڈآتا کوآرڈی نیشن کن ادارہ جاتی فریم ورک ءِ پین سوگو کننگ آ امنا کریر۔

(اے پی پی)