آ ئی ایم ایف تون ہیت آک پک، ڈیفالٹ نا گمان اف، اسحاق ڈار

اسلام آباد: بنجائی وزیر خزانہ سینیٹر اسحاق ڈار پارینے کہ آئی ایم ایف تون معاہدہ کن ننا ٹیکنیکل ٹیم کاریم ءِ پورو کرینے‘ ڈیفالٹ نا ہچ ءُ خطرہ اس اف‘ پاکستان نا زرگزران داسہ تیزی اٹ گچینی نا کنڈآ ہننگ اٹی ءِ‘ بجٹ نا بابت بروک کل سلاہ تے بخیر اٹ پانہ‘ ننے بھاز آ چیلنج آک مون تروک ءُ کل انا اواری اٹ کاریم کننگ خوانہ‘ 2017ء ٹی پاکستان دنیا نا 24میکو بھلا زرگزران جوڑ مسوسس۔ ایف بی آر اٹ بجٹ سلاہ تابابت دیوان آن تران کرسا اسحاق ڈار پارے کہ نن کن دا بھلو چیلنج اسے کہ ننے ملک ءِ دوارہ زرگزرانی واک جوڑ کننگ نا کنڈآ دروئی ءِ‘ داٹی مشکل آک اریر‘ ہرا بھلا مشکل ءِ او فارن کرنسی ءِ۔ وزیرخزانہ پارے کہ بجٹ نابابت بروک کل سلاہ تا ستاءِ کینہ۔ 2017ء ٹی پاکستان دنیا نا 24میکو بھلا زرگزران ئس‘ داسہ ننے کیہی چیلنج آک مون تروک ءُ‘ ننے کل ءِ اواری اٹ پاکستان ءِ مونی دروئی ءِ‘ تکلیف اس بریک تو اواری اٹ گزران کروئی مریک۔ اسحاق ڈار پارے کہ ننا ٹیم زرگزران نا گچینی کن دے ونن کاریم کننگ اٹی ءِ‘ ننا ٹیم بھاز کوشست کرینے‘ کیہی سال آن پد اولیکو وار تدوک آ اِرا تُو اٹ کرنٹ اکاؤنٹس پلس اٹ بسنے‘ ہیت مسکہ کہ پاکستان ڈیفالٹ کیک ولے نن ہندن مینج کرین کہ دنیا ہم حیران ءِ کہ دا کل گڑاک امر مننگ ءُ‘ پاکستان تیزی اٹ ویل آتیان پیش تمنگ اٹی ءِ‘ ننا زرگزران تیزی اٹ گچینی نا کنڈآ ہننگ اٹی ءِ۔ اوپارے کہ آئی ایم ایف تون ایگریمنٹ کن ننا ٹیکنیکل ٹیم کاریم ءِ پورو کرینے‘ پاکستان ءِ چیلنج آک مون تروک ءِ‘ کل ءِ سماءِ کہ مشکل آک ئسر وای باور کرفوہ کہ پاکستان ڈیفالٹ کپک۔ آئی ایم ایف تون معاہدہ سلوک ءِ ولے نن مایوس افن و ملک ءِ ڈیفالٹ کن الیپنہ۔ اسٹیٹ بینک تون اوار ایلو ادارہ غاتا دا بابت کڑدار اہم ءِ۔ او پارے کہ پاکستان تاریخ اٹ اسہ پروگرام اس پورو کرینے او 2013ء غان 2016ء اسکان ئس‘ نن پنچ ونیم ارب ڈالر کمرشل بینک آتے پدی تسن‘ نن 2013ء ٹی ہندن انگا حالیت آتیان پیش تماسُن وداسہ ہم پیش تمنہ۔

(آن لائن)