گوادر چیمبر آف کامرس نا ڈل انا جاپانی قونصلیٹ نا دورہ

کوئٹہ : گوادر چیمبرآف کامرس اینڈ انڈسٹری نا ڈل کوئٹہ ٹی جاپانی قونصلیٹ نا دورہ ءِ کرینے۔ ڈل اٹی گوادر چیمبر آف کامرس اینڈ انڈسٹری نا صدر میر نوید کلمتی، چیئرمین گوادر سٹی محمد شریف میانداد، چیئرمین سربندر نصیب نوشیروانی و چیئرمین پشوکان شکیل حاجی اسک اوار ئسر۔ گوادر چیمبر آف کامرس اینڈ انڈسٹری نا ڈل جاپان نا اعزازی قونصل جنرل سید ندیم عالم شاہ و پاکستان جاپان بزنس فورم نا ڈائریکٹر و سلاہکار زرکاری بورڈ گورنمنٹ آف پاکستان سید فیروز عالم شاہ تون اوڑدہی کرے۔ اوڑدہی ٹی ہڑتوم آکنڈآتا واپار نا مون آ دننگ تون اوار ایلو امور تیا گپ وتران مس۔ گوادر چیمبر آف کامرس اینڈ انڈسٹری نا صدر میر نوید کلمتی نا پاننگ ئس کہ گوادر اٹی زرکاری کننگ نا بھلو وارخواہی اس ساڑی ءِ ہنداسوب آن جاپان نا زرکارآک گوادر اٹی زرکاری کیر، سی پیک پروجیکٹ نا پوروی آن گوادر آخبت خڑک اٹی ملک انا زرگزرانی حب جوڑ مریک، نیامی ایشیائی ملک آتون اوار ایلو ملک آک گوادر پورٹ آن فائدہ ہرفنگ کیرہ۔ سلاہکار زرکاری بورڈ حکومت پاکستان سید فیروز عالم شاہ نا پاننگ ئس کہ پاکستان نا زرگزرانی شونداری ٹی بزنس کمیونٹی نا اہم ءُ کڑ د اسے، گوادر پاکستان نا شونداری و شونہالی نا گیٹ وے ءِ پاکستان نا شونداری گوادر و بلوچستان تون وابستہ ءِ، ہندا سوب آن مچ آ دنیا نا زرکارآتے گوادر اٹی زرکاری کننگ نا ترغیب ایتر۔ جاپان نا اعزازی قونصل جنرل سید ندیم عالم شاہ ناپاننگ ئس کہ گوادر اٹی فل پروف سیکورٹی نظام اس ٹہیفنگ کن جاپان و دبئی تون اوار ایلو شون ہولک ملک آتا طرز آ پولسنگ و سیکورٹی نا نظام اس ٹہیفنگ نا گرج ءِ تانکہ ملکی و درملکی زرکارآک پرسکون چاگڑد اٹ زرکاری کیر۔

(اے پی پی)