صدر مملکت ءِ لس گچین کاری تا پد بٹنگ نا بابت معلومدار کننگا

اسلام آباد : الیکشن کمیشن صدر مملکت عارف علوی آ چٹھی نوشتہ کرسا پنجاب اٹ لس گچین کاری تا پد بٹنگ نا بابت معلومدار کرے۔ حوالی نا رد اٹ لس گچین کاری تا پد بٹنگ ناباندات آ الیکشن کمیشن نا کنڈآن صدر مملکت آ راہی کروک چٹھی ٹی پنجاب نا گچین کاری تا منسوخی نا سوب آتے پاننگانے۔ الیکشن کمیشن نا کنڈآن صدر مملکت ءِ 8اکتوبر نا پوسکن آ پولنگ نا تاریخ آن ہم آگاہ کننگا۔ صدرمملکت عارف علوی ءِ 8اکتوبر نا پولنگ نا پوسکن آ تاریخ آن آگاہ کننگ سلابتی عمل نا بشخ اسے‘ حوالی نا رد اٹ صدر آ راہی کروک چٹھی ٹی پاننگا کہ بنجائی وصوبائی حکومت آتا کنڈآن پیش کروک حالیت آتا سوب آن 30اپریل آ گچین کاری کرفنگ مفک‘ ہندا سوب آن الیکشن کمیشن8مارچ آ جاری کروک شیڈول آن دزکش مسنے‘ داسہ گچین کاریک 8 اکتوبر آ اڈ تننگرہ ہراڑکن وخت پوسکن آ شیڈول ءِ جاری کننگک‘ چٹھی ٹی الیکشن کمیشن و عدالت آتا چندی فیصلہ غاتا حوالہ ہم تننگا۔ یات سلے کہ سپریم کورٹ ناپرمان آ پنجاب اسمبلی نا گچین کاری تیکن 30اپریل پک کننگاسس و گچین کاری شیڈول ہم جاری کننگاسس۔ ایلو کنڈ آ انٹرنیشنل مانیٹری فنڈ (آئی ایم ایف) پارینے کہ ننا دن ءُ ہچ ءُ شڑت اس اف ہراکہ پاکستان اٹ گچین کاری زہمی کیر‘ پاکستان کن آئی ایم ایف نا نمائندہ ایستھر پیریز پارینے کہ پاکستان اٹ صوبائی و لس گچین کاری تے کرفنگ نا بابت وخت ءِ پک کننگ و ایلو فیصلہ غاتے پورو وڑ اٹ پاکستان نا ادارہ غاک کیرہ۔ پاکستان اٹ مروک صوبائی گچین کاریک پاکستان نا تہہ انا باندات ءُ دا بابت ہچ ءُ ہیت اس متنے و نئے پاکستان کن پروگرام اٹ دا وڑ انا شڑت اس ارے ہرا آئینی سرجز آتے ٹی اڑاند مرے یا پاکستان اٹ گچین کاری عمل زہمی مرے۔ آئی ایم ایف پروگرام عمومی ہدف پک کیک‘ پروگرام اٹ داخس مالی گنجائشت ارے کہ زیات پیسہ مچ کننگ یا مہالو آک پک کروک خڑچ آتے ٹی بدلی اتسا آئینی سرجز آتے پورو کننگ مرے۔ الیکشن کمیشن لس گچین کاری تے ٹی پنچ تُو پد شاغنگ نا سوب ءِ ملک اٹ زرگزرانی تنکی و سکیورٹی گڑتی پاریسس ہراڑا آئی ایم ایف وضاحت جاری کرے۔

(آن لائن)