کل لس گچین کاریک اکتوبر اٹی مریرہ، خواجہ آصف

اسلام آباد : وزیر دفاع خواجہ محمد آصف پیدوار پارینے کہ قومی و صوبائی اسمبلی تا گچین کاریک اکتوبر اٹ مریرہ‘ دا باندات آ حکومت الیکشن کمیشن تون سلوک ءِ‘ دا وخت آ گچین کاری تیکن نئے فنڈ ارے و نئے فوج‘ فوج پولنگ اسٹیشن نا تہٹی ڈیوٹی کننگ خواپک۔ سکیورٹی نا حالیت آک داسہ ہم پد ریسہ خراب مننگ اٹی ءُ۔ عمران خان تون اوار کل سیاسی واکدارآتتون پاکستان ءِ مون تروک چیلنج آتیا ہیت مننگ کیک ولے وخت آن اقتدار ءِ بدل کننگ آ مننگ کپک۔ عمران خان اسہ مایوس و خار تروک ءُ بندغ اسے ہرا دزگیری آن بچنگ کن بیدادی نا کسر ءِ تینائی کرے‘ مہالو امریکہ ءِ کرینگ تسکہ داسہ اوڑان کمک خواہنگ اٹی ءِ و لابی تا کمک دوئی کرینے۔ زلمے خلیل زاد ءِ پاکستان اٹ 50 لکھ اوغان مہاجر و کشمیر و فلسطین اٹ بیدادی نظر بفسہ ہراکہ اینو پگہ عمران خان نا مخ تفی ءِ کننگ اٹی ءِ نن دا وڑ انا نیام تمنگ نا برخلاف ان۔ دا خیال آتا درشانی ءِ حوالکاری وزیر مریم اورنگزیب تون اوار درملکی میڈیا تون ہیت وگپ کرسا کرے۔ او پارے کہ عمران خان ءِ آئینی وڑ اٹ بے پتی نا تحریک اٹ کشنگا، عمران خان غیرآئینی ور اٹ قومی اسمبلی ءِ پرغاسس۔ او عمران خان ءِ بیدادی ءِ دوست توروک بندغ اس گوندسا پارے کہ ہراتم ہم او عدالت آتے ٹی پیش مریک لٹ وکٹ و بیداد کیک۔ او پارے کہ عمران خان ءِ دزگیر کننگ نا کوشست اٹ 60 آن زیات سکیورٹی ادارہ غاتا افسر و کارندہ ٹھپی مسر۔ عمران خان مدام ادارہ غاتا برخلاف پروپیگنڈہ کرے‘ او ضد کننگ اٹی ءِ کہ عدالت آتا مون آ پیش مفک وخت اس کہ پاکستان نا تاریخ اٹ اسہ سیاستدان اس ہم دن کتنے۔ نواز شریف،آصف زرداری و کنے دزگیر کننگا وخت اس ہم دُن مزاحمت متنے ہراوڑ دا کننگ اٹی ءِ۔ او پارے کہ او تو اپوزیشن ءِ سیاسی بیرانا گواچی کرے و داسہ تینٹ دزگیری آن نرنگ اٹی ءِ بلکہ غیر کانودی گام گیج آتا سیبو ءِ ہلنگ اٹی ءِ۔ عمران خان و اونا کارندہ غاک عدالت آتیا جلہو کننگ اٹی ءُ و اوفتے بے شرف کننگ اٹی ءُ۔ خواجہ آصف پارے کہ نن خوشی اٹ حکومت اٹ بتنن دانا اسہ بیک گراؤنڈ اسے‘ نن حکومت اٹ بننگ نا نسخان ہم ہرفینن۔ دا ملک اٹ ذوالفقار علی بھٹو ءِ پاہو تننگا‘ بے نظیر بھٹوءِ شہید کننگا‘ آمریت نادور تے ٹی نن بیرہلوک کارروائی تتون تون تسن ولے عمران خان بدترین سیاسی بیر ہلوک کارروائی کرے۔ نن عمران خان ءِ زرگزران آ میثاق نا سلہ خلکن او نمن مس‘ سال اسسکان دا اسٹیبلشمنٹ تون مذاکرات نا کوشست کرسا کرے‘ او صدر نا کمک اٹ مسکوہی آرمی چیف جنرل باجوہ تون ارا اوڑدہی کرے‘ او جنرل باجوہ ءِ مچ عمر توسیع نا سلہ خلک۔ خواجہ آصف پارے کہ کل سیاسی جماعت آتتون ہیت وگپ نا اشارہ ترسا پارے کہ نن بھلا سرحال تیا امنائی خوانہ۔ پاکستان ءِ مون تروک چیلنج آتیا وسیع و جم مذاکرات کن تیار ان۔او ٹرانزیکشن آ مذاکرات ءِ بیرہ وخت انا زیان گوندسا پارے کہ دا وخت آ ہرا حالیت آک ءُ بیدادیک ودنگ کیرہ۔او پارے کہ عمران خان خار تروک ءُ انسان اسے‘ تحریک انصاف ریاستی مشینری نا برخلاف منظم وڑ اٹ بیدادی تے مونی دننگ اٹی ءِ ولے حکومت ہر وڑ انا بیدادی تے چٹفنگ کن پورو وڑ اٹ سنبرینگوک ءِ و سختی دانا مون ءِ تورک۔ عمران خان ناکسفنگ نا دوبہ غاک بے بنداو و غیرسنجیدہ ءُ دا بندغ یوٹرن نا ماسٹر ءِ۔

(آن لائن)