کس انا بیانک پاکستانی الس ءِ ریفنگ کپسہ، دفتر خارجہ

اسلام آباد : پاکستان زلمے خلیل زاد نا بیان آ سخت موقف تینائی کرسا پارینے کہ کس انا بیانک پاکستانی الس ءِ ریفنگ کپسہ‘ پیشن ملک آتیان نیام تمنگ یا بیانک ننا جمہوری عمل ءِ زہمی کننگ کپسہ‘ حکومت پاکستان اسہ بندغ اسے نا ہیت آتا ورندی ءِ انتئے ایتے؟ ترجمان دفتر خارجہ ممتاز زہرا بلوچ بریفنگ ترسا پارے کہ سیکرٹری خارجہ اسد مجید خان چین انا ہم انگا دورہ ءِ کرسا چینی نائب وزیر خارجہ تون اوڑدہی کرینے‘ او پارے کہ پاکستان و چین سی پیک تون اوار کل بشخ آتے ٹی کمک ءِ پین ودفنگ امنا کرینو۔ ترجمان پارے کہ سی پیک ءِ تین پہ تینی ڈٹ اسے تکنہ‘ ایلو ملک آک ہم دانا بشخ مننگ کیرہ، سی پیک نا بشخ مننگ کن ہت وگپ مرسا کیک ولے داسکان داڑا ہچ ءُ پیشرفت اس متنے۔ ترجمان پارے کہ ننا خواست ءِ کہ بھارت مقبوضہ جموں و کشمیر اٹ بیدادی تے بند کے، پاکستان مقبوضہ کشمیر اٹ انسانی حق آتا خلاف ورزی تیا توار چست کرسا کیک۔ ترجمان سعودی عرب اٹ تعینات سفیر ءِ اسہ کسبی سفیر اس گوندسا پارے کہ وزارت خارجہ نٹی بدلیک مرسا کیرہ‘ داسکان کس انا بدلی نا خبر اف ہرتم مس تو شیئر کننگک۔ پاکستان و ملائیشیا نا نیام اٹ تین پہ تینی سیاسی سلابت بروک آ ہفتہ کوالالمپور اٹی مریک۔ داہیت ءِ دفترخارجہ ناترجمان جمعہ نادے آ پریس حوال اٹی پارے۔ اوپارے کہ ہڑتوم آ ملک آتا نیام اٹ تین پہ تینی سیاسی سلابت نا ایجنڈا ٹی سیاسی، سیکورٹی و فوجی کمکاری آن بیدس واپار و زرکاری نا تعلقداری، سائنس و ٹیکنالوجی ٹی کمکاری، جان جوڑی، سیل و سوات و دودوربیدگ آ گپ وتران اوار ءِ۔ ترجمان پارے کہ فریق آک علاقائی و جہانی ویل بشمول پیسفک ڈیہہ اٹی مروک آ پیش رفت، موسمیاتی بدلی و اسلاموفوبیا آ ہم گپ وتران کیرہ۔

(آن لائن/ اے پی پی)